కోన కేఎఫ్‌ సీ స‌మ‌ర్పించు.. అభినేత్రి

కె.ఎఫ్‌.సి చికెన్ గురించి జ‌నాల‌కు బాగానే తెలుసు. ఐతే ఇప్పుడు కె.ఎఫ్‌.సి సినిమాలు కూడా రాబోతున్నాయి. అది ఎక్క‌డో హాలీవుడ్ లో కాదండోయ్‌. మ‌న టాలీవుడ్ లోనే. ఇంత‌కీ ఈ కె.ఎఫ్‌.సి. అంటే ఏంటో తెలుసా.. కోన ఫిలిం కార్పొరేష‌న్‌. మ‌న స్టార్ రైట‌ర్ కోన వెంక‌ట్ కొత్త‌గా పెట్టిన బేన‌ర్ ఇది. ఇప్ప‌టిదాకా కోన వెంక‌ట్ స‌మ‌ర్పించు అని మాత్ర‌మే వేసుకున్న కోన ఇప్పుడు త‌న బేన‌ర్ ను కూడా జ‌నాల‌కు ప‌రిచ‌యం చేస్తున్నాడు. ఈ బేన‌ర్ మీద రాబోతున్న తొలి సినిమా పేరు.. అభినేత్రి. ఈ రోజే దీని టైటిల్ లోగో బ‌య‌టికి వ‌చ్చింది. రెడ్ క‌ల‌ర్ బ్యాగ్రౌండ్ లో .. గోల్డ్ సిల్వ‌ర్ మిక్స్ చేసి టైటిల్ లోగోను భ‌లే ఆక‌ర్ష‌ణీయంగా డిజైన్ చేయించాడులే కోన వెంక‌ట్‌. చూడ‌గానే ఇట్టే ఆక‌ట్టుకుంటోంది ఈ టైటిల్ లోగో.

ఇంత‌కీ కోన సినిమాలో అభినేత్రిగా క‌నిపించ‌బోయేది ఎవ‌రో తెలుసా.. మిల్కీ బ్యూటీ త‌మన్నా. అమ‌లా పాల్ భ‌ర్త అయిన ప్రముఖ త‌మిళ ద‌ర్శ‌కుడు.. ఎ.ఎల్‌.విజ‌య్ ఈ చిత్రాన్ని రూపొందిస్తున్నాడు. ప్ర‌భుదేవాతో పాటు సోనూ సూద్ కీల‌క పాత్ర‌లు పోషిస్తున్నారిందులో. తెలుగు-త‌మిళం-హిందీ భాష‌ల్లో ఒకేసారి ఈ చిత్రం తెర‌కెక్కుతోంది. హార్ర‌ర్ నేప‌థ్యంలో వెరైటీ థ్రిల్ల‌ర్ గా ఈ చిత్రాన్ని తెర‌కెక్కిస్తున్నాడు విజ‌య్‌. త‌మ‌న్నా-ప్ర‌భుదేవా ఇందులో భార్యాభ‌ర్త‌లుగా న‌టిస్తుండ‌టం విశేషం. సినిమా సినిమాకు వైవిధ్యం చూపించే విజ‌య్ హార్ర‌ర్ నేప‌థ్యంలో.. చిత్ర‌మైన కాంబినేష‌న్ లో తెర‌కెక్కిస్తున్న ఈ సినిమాపై సౌత్ లో మంచి అంచ‌నాలే ఉన్నాయి.