‘మెహబూబా’ది ప్రచారమా.. నిజమా?

బుధవారం ప్రేక్షకుల ముందుకొచ్చిన ‘మహానటి’ సినిమాకు ఎలాంటి టాక్ వస్తోందో తెలిసిందే. ఈ మధ్య కాలంలో ఏ సినిమాకూ.. ‘రంగస్థలం’కు సైతం ఈ స్థాయిలో పాజిటివ్ టాక్ రాలేదంటే అతిశయోక్తి కాదు. ఈ టాక్ దెబ్బకు నిన్న సాయంత్రానికే వసూళ్లు కూడా బాగా పుంజుకున్నాయి. ఈ పరిణామం శుక్రవారం రిలీజ్ కాబోతున్న ‘మెహబూబా’ సినిమాకు అంత మంచి సంకేతాలిచ్చేది కాదు. ఈ చిత్రం దర్శకుడిగా పూరి జగన్నాథ్ కు.. హీరోగా పరిచయం కాబోతున్న పూరి ఆకాశ్ కు ఎంతో కీలకం. ఈ నేపథ్యంలో ‘మెహబూబా’కు ఎలాంటి టాక్ వస్తుందా అని అందరూ ఉత్కంఠగా ఎదురు చూస్తున్నారు. నిజానికి ‘మెహబూబా’ మీద మొదట్లో ఎలాంటి బజ్ లేదు. కానీ దీని టీజర్.. ట్రైలర్ ఆకట్టుకోవడం.. దిల్ రాజు ఈ ప్రాజెక్టులోకి రావడంతో కొంత హైప్ వచ్చింది. కానీ విడుదల ముంగిట సరైన ప్రమోషన్లు లేకపోవడంతో.. దీని కంటే రెండు రోజుల ముందు రిలీజవుతున్న ‘మహానటి’ మీద అందరి ఫోకస్ ఉండటంతో ‘మెహబూబా’ వార్తల్లో లేకుండా పోయింది.

ఇక ‘మహానటి’ విడుదల తర్వాత దానికి వస్తున్న టాక్ మరింత కంగారు పెడుతోంది. ఈ నేపథ్యంలో ‘మెహబూబా’ టీం అప్రమత్తమైంది. ప్రేక్షకుల దృష్టిని ‘మెహబూబా’ వైపు మళ్లించడానికి బుధవారం సాయంత్రం నుంచే హంగామా మొదలుపెట్టింది. కొందరు విద్యార్థులు.. సినీ ప్రముఖులకు స్పెషల్ షో వేసింది. సినిమా చూసిన వాళ్లు చేసిన పాజిటివ్ ట్వీట్లను రీట్వీట్ చేస్తూ ఇటు పూరి జగన్నాథ్.. అటు ఛార్మి ప్రచారం హోరెత్తించే ప్రయత్నం చేశారు. ‘మెహబూబా’ గురించి పాజిటివ్ గా మాట్లాడిన వాళ్లలో స్టార్ రైటర్ కోన వెంకట్ ఒకడు. మెహబూబా చూసి ఒక అనుభూతికి లోనయ్యానని.. పూరి ప్రేమతో తీసిన ఒక గొప్ప ప్రేమకథ ఇదని.. ఆకాశ్ చాలా బాగా చేశాడని కితాబిచ్చాడు. ఇలాగే మరిన్ని పాజిటివ్ ట్వీట్లు పడ్డాయి. మరి వీళ్లు చెబుతున్నంత రేంజిలో సినిమా ఉందా.. లేక సినిమాకు హైప్ తేవడానికి ఇలా ముందస్తు ప్రచారం మొదలుపెట్టారా అన్న డౌట్లు కూడా ఉన్నాయి. మరి ఏది నిజమో ఇంకొక్క రోజులో తేలిపోతుంది.