చైతూ ‘సాహసం’ రిలీజ్ అప్పుడే అంటున్న కోన

ఇంకా షూటింగ్ పూర్తి చేసుకోని సినిమాలకు రిలీజ్ డేట్లు ఇచ్చేశారు. ఇప్పుడిప్పుడే రిలీజయ్యే అవకాశాలు లేని సినిమాలు కూడా వచ్చేస్తున్నాయి. కానీ ఎప్పుడో పూర్తయిన ‘సాహసం శ్వాసగా సాగిపో’ విడుదల సంగతేంటో మాత్రం తెలియట్లేదు. ఈ సినిమా విషయంలో అసలేం జరుగుతోందో జనాలకు అర్థం కావడం లేదు. గౌతమ్ మీనన్-నాగచైతన్యల క్రేజీ కాంబినేషన్లో తెరకెక్కిన ఈ సినిమాపై ఒకప్పుడు ఎంతో ఆసక్తి ఉండేది. కానీ రిలీజ్ వాయిదాల మీద వాయిదాలు పడుతుండటంతో నెమ్మదిగా ఆసక్తి తగ్గిపోతోంది. రిలీజ్ డేట్ ఏదో తెలియక జనాలు ఫ్రస్టేట్ అయిపోతున్నారు. ఇలాంటి టైంలో ఈ సినిమా చూడాలనుకునే జనాలకు ఊరటనిచ్చే విషయం చెప్పాడు కోన వెంకట్.

‘సాహసం శ్వాసగా సాగిపో’ ఆగస్టులోనే విడుదలవుతుందని ట్విట్టర్లో ప్రకటించాడు కోన. ఈ సినిమాను తెలుగులో సమర్పిస్తున్నది కోననే అన్న సంగతి తెలిసిందే. ఐతే రిలీజ్ డేట్ ఏంటన్నది మాత్రం చెప్పలేదు. ఆగస్టులో రిలీజ్ పక్కా అని ఇప్పుడే గౌతమ్ మీనన్ కన్ఫమ్ చేశాడని.. రెండు రోజుల్లో డేట్ కూడా ప్రకటిస్తామని కోన వెల్లడించాడు. ఐతే ఇంతకుముందు సినిమా జులైలో విడుదలవుతందని చెప్పింది కూడా కోననే. మరి ఆ మాట నిలబెట్టుకోలేకపోయాడు. మరి కొత్త డేట్ విషయంలో అయినా కట్టుబడతాడేమో చూడాలి. చైతూ సరసన మాంజిమా మోహన్ నటించిన ఈ సినిమా.. ‘ఏమాయ చేసావె’కు సీక్వెల్ కాని సీక్వెల్. ఇందులోనూ కార్తీక్ అనే కుర్రాడి పాత్రలోనే కనిపిస్తాడు చైతూ. ఇందులోనూ ప్రేమకథ ఉంటుంది. కానీ కొంత యాక్షన్ కూడా జోడించాడు గౌతమ్. తమిళంలో ఇదే సినిమాను శింబు కథానాయకుడిగా తెరకెక్కించాడు.