అడివి శేష్ ఆంధ్రా అమీర్ ఖానట

‘గూఢచారి’ టీజర్.. ట్రైలర్ చూసినప్పటి నుంచి జనాలు.. అతడిని దేశీ బాండ్ అంటున్నారు. సోషల్ మీడియాలో ఈ మాట బాగా పాపులర్ అయింది. ఇప్పుడు శేష్‌ కు ఇంకో కొత్త ట్యాగ్ వచ్చింది. అతను ఆంధ్రా అమీర్ ఖాన్ అట. ఈ కితాబిచ్చింది వేరెవరో కాదు.. స్టార్ రైటర్ కోన వెంకట్. తాను శేష్ గురించి చాలా విన్నానని.. అతను పర్ఫెక్షన్ కోసం ప్రాణం పెడతాడని.. అందరినీ చాలా వేధిస్తాడని తెలిసిందని కోన చెప్పాడు. బాలీవుడ్లో అమీర్ ఖాన్ ను అందరూ మిస్టర్ పర్ఫెక్షనిస్ట్ అంటారని.. కాబట్టే శేష్ ను తాను ఆంధ్రా అమీర్ ఖాన్ అంటున్నానని కోన అన్నాడు. ‘గూఢచారి’ టీజర్ చూడగానే తనకు గొప్ప అనుభూతి కలిగిందని.. చాలా ప్రౌడ్ గా ఫీలయ్యానని కోన చెప్పాడు.

తాను ఇకపై వేరే ఇండస్ట్రీలకు వెళ్తే.. ‘గూఢచారి’ తీసిన పరిశ్రమకు చెందిన వాడినంటూ ఈ చిత్రాన్ని విజిటింగ్ కార్డులాగా ఉపయోగించుకుంటానని కోన అనడం విశేషం. ‘బాహుబలి’ కోసం ఆ చిత్ర బృందం ఎంత కష్టపడిందో.. ఎన్ని రోజులు షూటింగ్ చేసిందో.. ‘గూఢచారి’ కోసం కూడా ఈ టీం అంతే కష్టపడిందని కోన అన్నాడు. కొన్ని రోజుల కిందటే తన మిత్రుడు ఒకరు ‘గూఢచారి’ ప్రివ్యూ చూశారని.. చూశాక బయటికి వచ్చి వెంటనే తనకు కాల్ చేశారని.. అతను సైలెంటుగా మాట్లాడుతుంటే టెన్షన్ కలిగిందని.. ఎలా ఉంది సినిమా అంటే.. చాలా బాగుంది పెద్ద హిట్టవుతుంది అని చెప్పాడని.. అప్పట్నుంచి తాను కూడా ఈ సినిమా ఎప్పుడెప్పుడూ చూద్దామా అని ఉత్కంఠగా ఎదురు చూస్తానని.. ఈ సినిమా తెలుగు సినిమా స్థాయిని కొన్ని మెట్లు ఎక్కిస్తుందని ఆశిస్తున్నానని కోన చెప్పాడు.