స్టార్ రైటర్ ను ఇక మర్చిపోవచ్చా?

కోన వెంకట్.. స్టార్ రైటర్ గా టాలీవుడ్ లో తెగ వెలిగిపోయాడు. కోన పేరు ఉంటే థియేటర్లకు ఆడియన్స్ వచ్చే పరిస్థితి కూడా కనిపించింది. ఒకేసారి స్టార్ హీరోలందరికీ కథ, మాటలు అందించేస్తూ రికార్డ్ కూడా సృష్టించేశాడు. కానీ కొన్ని నెలలుగా కోన జాతకం తిరగబడిపోయింది. రైటర్ గానే కాదు.. వివాదాలతో కూడా పేరు చెడగొట్టేసుకున్నాడు. దీంతో కోనకు అవకాశాలు ఇవ్వాలంటే దర్శకుడు భయపడే పరిస్థితి కూడా వచ్చేసింది.

రైటర్ గా తన పరిస్థితిలో తేడా రావడంతో.. రూట్ మార్చేశాడు కోన వెంకట్. వరుసగా ప్రొడక్షన్ చేసేస్తున్నాడు. తన రచయితగా, నిర్మాతగా, దర్శకత్వ పర్యవేక్షణ కూడా చేసేసిన శంకరాభరణం తేడా కొట్టినా.. నిర్మాణంలో మాత్రం కోన అడుగులు స్పీడ్ గానే పడుతున్నాయి. ప్రస్తుతం చైతూ మూవీ సాహసం శ్వాసగా సాగిపో చిత్రం తెలుగు వెర్షన్ కు కోన వెంకట్ నిర్మాత. ఇది కాకుండా తమన్నా లీడ్ రోల్ లో నటిస్తున్న అభినేత్రిని కూడా ప్రొడ్యూస్ చేస్తున్నాడు.

ఇప్పుడు మరో సినిమా స్టార్ట్ చేసినట్లు కోన వెంకట్ ట్వీట్ ద్వారా తెలిపాడు. 'ప్రభుదేవా దర్శకత్వంలో అభిషేక్ బచ్చన్ తో కలిసి పనిచేస్తున్నందుకు సంతోషంగా ఉంది. కొత్త కథ - కొత్త ప్రయాణం.. సాగుతూ ఉండాలి' అంటూ జూనియర్ బచ్చన్ - ప్రభుదేవాలతో దిగిన ఒక ఫోటోను కూడా పోస్ట్ చేశాడు కోన. చూస్తుంటే.. ఇక రైటర్ గా కోన వెంకట్ ను మర్చిపోయి.. నిర్మాత కోననే చూడాల్సి వచ్చేట్లుంది.