ఆడియో ఫంక్షన్స్ ట్రెండ్‌ ను తిరిగి తీసుకొస్తున్న 'కొండ పొలం

సినిమా ప్రమోషన్స్ లో భాగంగా ఒకప్పుడు ఇండస్ట్రీలో ఆడియో ఫంక్షన్స్ జరిగేవి. సినిమా విడుదల అవడానికి ముందు జరిగే ఈ ఈవెంట్ ని చాలా గ్రాండ్ గా నిర్వహించేవారు. దీనికి వచ్చే రెస్పాన్స్ ని బట్టి సినిమాపై బజ్ ని అంచనా వేసేవారు. అందుకే చిత్ర బృందం టాలీవుడ్ లోని బిగ్ స్టార్స్ ని గెస్టులుగా పిలిచి ఆడియో క్యాసెట్స్ ని లాంచ్ చేయించేవారు. ఆ తర్వాత టెక్నాలజీలో వచ్చిన మార్పులకు అనుగుణంగా మ్యూజిక్ సీడీలు విడుదల చేసేవారు. అప్పట్లో ఆడియో రైట్స్ తీసుకున్న మ్యూజిక్ కంపెనీకి క్యాసెట్స్ - సీడీల అమ్మకాల రూపంలో కూడా ఆదాయం చేకూరేది.

కానీ ఇప్పుడు ట్రెండ్ చాలా మారిపోయింది. ఆడియో క్యాసెట్లు - సీడీ లకు కాలం చెల్లింది. సోషల్ మీడియా మధ్యమాలలో సాంగ్స్ రిలీజ్ చేస్తూ వస్తున్నారు. ఈ నేపథ్యంలో ఆడియో లాంచ్ ఈవెంట్లు పోయి ఇప్పుడు ప్రీ-రిలీజ్ ఈవెంట్స్ వచ్చాయి. ఆయితే ఇప్పుడు క్రియేటివ్ డైరెక్టర్ క్రిష్ జాగర్లమూడి మళ్ళీ ఆడియో ఫంక్షన్ ట్రెండ్ ను తిరిగి టాలీవుడ్ కు తీసుకొస్తున్నారు. తాను డైరెక్ట్ చేస్తున్న ''కొండ పొలం'' మూవీ ప్రమోషన్స్ లో భాగంగా ఆడియో రిలీజ్ ఈవెంట్ నిర్వహించబోతున్నట్లు దర్శకుడు ప్రకటించారు.

మెగా మేనల్లుడు పంజా వైష్ణవ్ తేజ్ - స్టార్ హీరోయిన్ రకుల్ ప్రీత్ సింగ్ జంటగా క్రిష్ తెరకెక్కిస్తున్న తాజా చిత్రం ''కొండ పొలం''. ఈ చిత్రాన్ని అక్టోబర్ 8న థియేటర్లలోకి తీసుకొస్తున్నారు. ఈ నేపథ్యంలో రేపు (అక్టోబర్ 2) శనివారం సాయంత్రం కర్నూలులో ఆడియో లాంచ్ ఈవెంట్ ఏర్పాటు చేస్తున్నారు. ఈ కార్యక్రమంలో మ్యూజిక్ డైరెక్టర్ ఎంఎం కీరవాణి లైవ్ పెర్ఫార్మెన్స్ ఇవ్వబోతున్నారని తెలుస్తోంది.

'కొండ పొలం' చిత్రానికి సంగీతం చాలా ముఖ్యమైనది. అందుకే ఈ పాటలను జనాల్లోకి తీసుకెళ్లి విస్తృతంగా ప్రచారం చేయడానికి బృందం ఈ ఆడియో ఈవెంట్‌ ను ప్లాన్ చేసింది. మ్యూజిక్ ప్రమోషన్స్ లో భాగంగా ఈ కార్యక్రమం ఇండస్ట్రీలో తిరిగి ఆడియో రిలీజ్ ఈవెంట్స్ ట్రెండ్ ని తీసుకొస్తుందేమో చూడాలి. ఇకపోతే కీరవాణి సమకూర్చిన 'ఓబులమ్మ' 'శ్వాసలో' పాటలు ఇప్పటికే విడుదలై, ప్రేక్షకుల నుండి మంచి స్పందన తెచ్చుకున్నాయి. అలానే ట్రైలర్ కూడా మిలియన్ల వ్యూస్ తో ట్రెండింగ్ లో కొనసాగుతోంది.

ఈరోజు 'కొండ పొలం' చిత్రానికి సంబంధించిన సెన్సార్ కార్యక్రమాలు కూడా పూర్తయ్యాయి. దీనికి బోర్డ్ వారు క్లీన్ 'U' సర్టిఫికేట్ జారీ చేశారు. సన్నపురెడ్డి వెంకట రామిరెడ్డి రాసిన 'కొండ పొలం' నవల ఆధారంగా ఈ సినిమా రూపొందుతోంది. బిబో శ్రీనివాస్ సమర్పణలో ఫస్ట్ ఫ్రేమ్ ఎంటర్టైన్మెంట్స్ బ్యానర్ పై రాజీవ్‌ రెడ్డి - జె. సాయి బాబు సంయుక్తంగా ఈ చిత్రాన్ని నిర్మిస్తున్నారు.