యంగ్ హీరోల్ని ఆకాశానికెత్తిన కోట

ఉన్నది ఉన్నట్టు గా సుత్తిలేకుండా - సూటిగా తన మనసులోని మాటను బైట పెట్టడం లో లెజెండరీ నటుడు కోట శ్రీనివాసరావు తర్వాతే ఎవరైనా. తరచుగా పరాయిభాషా నటుల్ని నెత్తినెక్కించుకొనే దర్శకుల మీద ధ్వజమెత్తే ఆయన.. ఇప్పుడు ఓ ఇద్దరు అచ్చతెలుగు యంగ్ స్టార్స్ ను ఆకాశానికెత్తేయడం టాలీవుడ్ లో హాట్ టాపిక్ గా మారింది. ఆ ఇద్దరూ ఎవరో కాదు నేచురల్ స్టార్ నానీ - అగ్రెసివ్ స్టార్ విజయ్ దేవరకొండ.

ఈ ఇద్దరి నటనకీ ఫిదా అయిపోతున్నానని కోట శ్రీనివాసరావే స్వయంగా చెప్పడం విశేషం. ఇందులో ముఖ్యంగా విజయ్ గురించి చెబుతూ.. అసలు విజయ్ దేవరకొండ నటిస్తున్నాడంటే నాకు నమ్మశక్యంగా ఉండదు. అతడేదో బిహేవ్ చేస్తున్నట్టే అనిపిస్తుందని అంటున్నారు కోట. సాధారణంగా ఆయన మెగాస్టార్ చిరంజీవి గురించి తరచుగా చాలా గొప్పగా చెబుతుంటారు. బహుశా చిరు తనతో సమానంగా ‘ప్రాణం ఖరీదు’ చిత్రంతో సినీ రంగంలోకి ఎంట్రీ ఇచ్చి.. తన కళ్ళ ఎదురుగానే మెగాస్టార్ గా మారడం ఆయన్ను ఆబ్బుర పరిచి ఉండొచ్చు - అలాగే.. ఆయన తనలాగే స్వయం శక్తితో పైకి రావడం కూడా ఒక కారణం కావచ్చు. ఏదేమైనప్పటికీ.. ఎలాంటి గాడ్ ఫాదర్స్ లేకుండా సినీరంగంలో ఎదిగేవాళ్లంటే కోట శ్రీనివాసరావుకి చాలా ఇష్టమని .. ఇప్పుడు నానీ - విజయ్ ల విషయంలో మరోసారి ప్రూవ్ అయింది. మరి సాక్షాత్తూ నటనలో పెట్టని కోటైన కోట శ్రీనివాసరావు పొగడడం అంటే.. ఇప్పుడున్న యంగ్ స్టార్స్ కు పెద్ద ఎచీవ్ మెంట్ కిందే లెక్క.