కొరటాల హృతిక్ ను డైరెక్ట్ చేస్తాడా?

‘మిర్చి’ లాంటి సూపర్ హిట్ తో దర్శకుడిగా అరంగేట్రం చేసి.. ‘శ్రీమంతుడు’ సినిమాతో ఆకాశమంత ఎత్తుకు ఎదిగిపోయాడు కొరటాల శివ. ప్రస్తుతం టాలీవుడ్ టాప్ డైరెక్టర్లలో అతనొకడు. రెండే రెండు సినిమాలతో ఈ స్థాయి అందుకున్న దర్శకులు చాలా కొద్ది మంది మాత్రమే. చాలామంది హీరోలు - నిర్మాతలు తనతో సినిమాకు ఆసక్తిగా ఉన్నా.. శ్రీమంతుడు నిర్మాతలకు, ఎన్టీఆర్‌ కు ముందే కమిట్ మెంట్ ఇవ్వడంతో వాళ్లకే సినిమా చేయబోతున్నాడు కొరటాల. ఐతే దీని తర్వాత కొరటాల ఏ హీరోతో జట్టు కడతాడు అన్న ప్రశ్న ఇప్పటికే మొదలైంది. అఖిల్ - అల్లు అర్జున్ లైన్ లో ఉన్నట్లు వార్తలొస్తున్నాయి.

ఐతే కొరటాల తన తర్వాతి సినిమా తెలుగులో చేసే అవకాశం లేదని.. అతను బాలీవుడ్ బాట పడతాడని అంటున్నారు సన్నిహితులు. తన ‘శ్రీమంతుడు’ సినిమానే హిందీలో హృతిక్ రోషన్ కథానాయకుడిగా తెరకెక్కించాలని ఆలోచిస్తున్నాడట కొరటాల. ‘శ్రీమంతుడు’ రీమేక్ విషయంలో హృతిక్ ఆసక్తిగానే ఉన్నాడట. తెలుగు వెర్షన్ ను హోల్ సేల్ గా కొనేసి విడుదల చేసిన ఈరోస్ ఇంటర్నేషనలే రీమేక్ రైట్స్ తీసుకుంది. అందులో కొరటాలకు 50 శాతం వాటా కూడా ఉంది. ఈ నేపథ్యంలో తనే ‘శ్రీమంతుడు’ రీమేక్ చేయడానికి ఆసక్తితో ఉన్నాడట. ఈరోస్ కూడా అందుకే ఓకే అందట. తెలుగులో జగపతి బాబు పోషించిన తండ్రి పాత్రను హృతిక్ తండ్రి రాకేష్ రోషనే పోషించే అవకాశాలున్నాయట.