అలరిస్తోన్న 'వర్జిన్ స్టోరి' లోని 'కొత్తగా రెక్కలొచ్చెనా'..!

ప్రముఖ నిర్మాత లగడపాటి శిరీష శ్రీధర్ తనయుడు విక్రమ్ సాహిదేవ్ హీరోగా పరిచయం అవుతున్న చిత్రం ''వర్జిన్ స్టోరి''. గతంలో 'రుద్రమదేవి', 'రేసు గుర్రం', 'నా పేరు సూర్య నా ఇల్లు ఇండియా' వంటి సూపర్ హిట్ చిత్రాల్లో నటించి పేరు తెచ్చుకున్నాడు విక్రమ్. తాజాగా దిల్ రాజు నిర్మించిన 'రౌడీ బాయ్స్' చిత్రంలో విక్రమ్ చేసిన క్యారెక్టర్ కు మంచి పేరు వచ్చింది.

ఈ క్రమంలో ఇప్పుడు ''వర్జిన్ స్టోరీ'' సినిమాతో ప్రేక్షకుల ముందుకు రాబోతున్నారు విక్రమ్. 'కొత్తగా రెక్కలొచ్చెనా..' అనేది దీనికి ట్యాగ్ లైన్. ప్రదీప్ బి అట్లూరి ఈ చిత్రంతో టాలీవుడ్ కు దర్శకుడిగా పరిచయం అవుతున్నారు. గౌరవ్ లగడపాటి సమర్పణలో రామలక్ష్మి సినీ క్రియేషన్స్ పతాకంపై లగడపాటి శిరీష - శ్రీధర్ ఈ చిత్రాన్ని నిర్మిస్తున్నారు.

యూత్ ఫుల్ లవ్ ఎంటర్టైనర్ గా తెరకెక్కుతున్న ఈ సినిమా నుంచి ఇప్పటికే విడుదలైన ఫస్ట్ లుక్ - రెండు పాటలు ప్రేక్షకులను ఆకట్టుకున్నాయి. ఈ నేపథ్యంలో తాజాగా సినిమా నుంచి 'కొత్తగా రెక్కలొచ్చేనా' అనే థర్డ్ సింగిల్ లిరికల్ వీడియోను మేకర్స్ రిలీజ్ చేశారు.

'వయ్యారి ఓ వయ్యారీ.. నీ ఊహాల్లోనే సవారీ.. వయ్యారి ఓ వయ్యారీ.. మనసంతా నీదే కచేరి' అంటూ సాగిన ఈ పాట శ్రోతలను అలరిస్తోంది. గౌరా హరి ఈ సాంగ్ కు ట్యూన్ కంపోజ్ చేయగా.. యువ గాయకుడు అనురాగ్ కులకర్ణి హుషారుగా ఆలపించారు. భాస్కర భట్ల క్యాచీ లిరిక్స్ అందించారు.

సహనం ఉంటేనే ప్రేమ దక్కుతుంది అనే పాయింట్ తో బిగినింగ్ నుంచి ఎండింగ్ వరకు ఎంజాయ్ చేసేలా 'వర్జిన్ స్టోరి' సినిమా ఉంటుందని నిర్మాత లగడపాటి శిరీష శ్రీధర్ చెబుతున్నారు. ఇప్పటికే అన్ని కార్యక్రమాలు పూర్తి చేసుకున్న ఈ చిత్రాన్ని వాలెంటైన్స్ డే సందర్భంగా ఫిబ్రవరి రెండో వారంలో థియేట్రికల్ రిలీజ్ చేయడానికి మేకర్స్ సన్నాహాలు చేస్తున్నారు.

'వర్జిన్ స్టోరి' చిత్రంలో విక్రమ్ సరసన సౌమిక పాండియన్ హీరోయిన్ గా నటిస్తుండగా.. రిషిక ఖన్నా - వినీత్ బవిశెట్టి కీలక పాత్రలు పోషించారు. అచు రాజమణి ఈ చిత్రానికి సంగీతం సమకూర్చగా.. అనీష్ తరుణ్ కుమార్ సినిమాటోగ్రఫీ అందించారు. గ్యారీ బీహెచ్ ఎడిటింగ్ వర్క్ చేశారు.