'టిఆర్పీ రేటింగ్'లో కూడా మేటి అనిపించుకున్న మాస్ రాజా..!

టాలీవుడ్ మాస్ మహారాజ్ రవితేజ ఈ ఏడాదిని క్రాక్ సినిమా విజయంతో ఆరంభించాడు. రవితేజ నటించిన ఈ మాస్ యాక్షన్ మూవీ సంక్రాంతి కానుకగా థియేటర్లలో విడుదలై భారీ విజయాన్ని నమోదు చేసింది. జనవరి 9న విడుదలైన ఈ మూవీ రవితేజ కెరీర్లోనే బిగ్గెస్ట్ కలెక్షన్స్ రాబట్టింది. చాలా సినిమాలు క్రాక్ తో పోటీ పడినప్పటికి సంక్రాంతి విజేతగా క్రాక్ నిలిచింది. ఈ సినిమా ఒంగోలులో జరిగిన నిజ సంఘటనల ఆధారంగా తెరకెక్కగా రవితేజ పోలీస్ అధికారిగా నటించాడు. ఫేమస్ కోలీవుడ్ యాక్టర్స్ సముద్రఖని, వరలక్ష్మి శరత్ కుమార్ లు కీలకపాత్రలలో నటించారు. భారీ అంచనాలతో ప్రేక్షకుల ముందుకొచ్చిన క్రాక్ వారి అంచనాలను అందుకుందని చెప్పవచ్చు. అందుకే బాక్సాఫీస్ వద్ద బ్లాక్ బస్టర్ గా నిలిచింది క్రాక్.

ఇదిలా ఉండగా.. క్రాక్ సినిమా థియేట్రికల్ రిలీజైన నెల రోజులకు ఆహా ఓటిటిలో విడుదలై అద్భుతమైన ఆదరణ దక్కించుకుంది. అనంతరం ఈ సినిమా మహాశివరాత్రి తర్వాత మార్చ్ 14న టీవీలో ప్రసారం అయింది. థియేటర్స్ తో పాటు క్రాక్ మూవీ.. ఓటిటి, టీవీలలో కూడా అదిరిపోయే ఆదరణ దక్కించుకుంది. స్టార్ మా ఛానల్ లో ప్రసారమైన క్రాక్ మూవీ.. 11.7 టిఆర్పీ రేటింగ్ నమోదు చేసింది. ఈమధ్య రవితేజ కెరీర్లో మంచి రేటింగ్ సాధించిన సినిమాగా రికార్డులోకెక్కింది. గోపీచంద్ మలినేని దర్శకత్వం వహించిన ఈ సినిమాను ఠాగూర్ మధు నిర్మించారు. అయితే ఇప్పటివరకు టిఆర్పి రేటింగ్ పరంగా టాప్ లో నిలిచింది అలవైకుంఠపురంలో(29.4). ఆ తర్వాత సరిలేరు నీకెవ్వరూ(23.4), బాహుబలి-2(22.7).. ఇలా వరుసగా ముందున్నాయి. ఆల్రెడీ జనాలు థియేటర్లు లేకపోతే ఓటిటిలలో సినిమాలు చూస్తూనే ఉన్నారు. అయినా సరే 11.7 రావడం అనేది మంచి విషయం అనే చెప్పాలి. మరి రెండోసారి ప్రసారం అయితే గనక ఇంకా బెటర్ రేటింగ్ తెచ్చుకుంటుందేమో చూడాలి!