మళ్లీ క్రిష్ తోనే చేస్తాడటగా..

ఏ కొత్త హీరో అయినా కెరీర్ ఆరంభంలో మాస్ ఇమేజ్ కోసమే తహతహలాడతాడు. కానీ వరుణ్ తేజ్ మాత్రం అందుకు భిన్నంగా నడుచుకున్నాడు. ‘ముకుంద’ లాంటి క్లాస్ లవ్ స్టోరీని తొలి సినిమాగా ఎంచుకున్నాడు. ఆ తర్వాతైనా మాస్ అడుగులు వేస్తాడేమో అనుకుంటే మళ్లీ.. ‘కంచె’ లాంటి మరో భిన్నమైన సినిమా చేశాడు. ఐతే ఇప్పుడు పూరి జగన్నాథ్ తో ‘లోఫర్’ చేస్తున్న వరుణ్.. ఇకపై వరుసగా ఆ టైపు కమర్షియల్ సినిమాలే చేస్తాడేమో, ఇక మళ్లీ ప్రయోగాల జోలికి వెళ్లడేమో అనుకున్నారంతా. కానీ అతను మాత్రం ఇటు కమర్షియల్ సినిమాలతో పాటు అటు ప్రయోగాత్మక చిత్రాలు సమాంతరంగా చేస్తూ పోవడానికే నిర్ణయించుకున్నట్లున్నాడు.

‘కంచె’ సినిమా కమర్షియల్ గా ఎలాంటి ఫలితాన్నిచ్చినా.. ఆ సినిమా వల్ల వరుణ్ కు వచ్చిన ప్రశంసలు అన్నీ ఇన్నీ కావు. కెరీర్ ఆరంభంలోనే ఇంత పేరు రావడం చూసి.. తాను ఎప్పుడు ఎలాంటి సినిమాలు చేయాలన్నది బాగానే అవగాహన వచ్చేసిందట వరుణ్ కి. అందుకే గోపీచంద్ మలినేనితో తన నాలుగో సినిమా తర్వాత మళ్లీ క్రిష్ తోనే ఓ సినిమా చేయాలని ఫిక్సయ్యాడట వరుణ్. క్రిష్ కూడా వరుణ్ మరింత స్టార్ ఇమేజ్ సంపాదించాక అతడితో మరో ఇంకా పెద్ద స్థాయి సినిమా తీయాలని అనుకుంటున్నాడట. గోపీ సినిమా చేసేలోపు తాను కూడా తన తర్వాతి సినిమా పూర్తి చేస్తామని.. మళ్లీ ఇద్దరం కలిసి సినిమా చేద్దామని ఓ అండర్ స్టాండింగ్ కి వచ్చేశారట. కాబట్టి మళ్లీ కంచె కాంబినేషన్ చూడబోతున్నట్లే.