క్రిష్.. శ్రియ కలిసి ఆడేసుకున్నారు

‘గౌతమీపుత్ర శాతకర్ణి’ సాధించిన విజయంతో ఆ చిత్ర యూనిట్ సభ్యులంతా చాలా సంతోషంగా ఉన్నారు. బాలయ్య వందో చిత్రం అంటే ఎంత పెద్ద బాధ్యతో చెప్పాల్సిన పని లేదు. అలాంటి సినిమాకు ఓ సాహసోపేత కథను ఎంచుకుని.. ఎన్నో కష్టనష్టాలకు ఓర్చి సినిమా పూర్తి చేశాడు క్రిష్. ప్రస్తుతం ఈ సినిమా సాధించిన విజయం క్రిష్ కు ఇచ్చినంత ఆనందం ఇంకెవరికీ ఇవ్వదు. ఎనిమిది నెలల పాటు ఎంతో భారాన్ని మోసి.. ఎంతో ఒత్తిడిని అనుభవించిన క్రిష్.. ఇప్పుడే దాన్నుంచి రిలీవ్ అయ్యాడు. సక్సెస్ ను ఆస్వాదిస్తున్నాడు. ఈ నేపథ్యంలోనే క్రిష్ చిన్న పిల్లాడిలా మారిపోయి పతంగుల మీద పడ్డాడు.

ముగిసిపోయిందనుకున్న తన కెరీర్ కు ‘గౌతమీపుత్ర శాతకర్ణి’తో మళ్లీ ఊపు రావడంతో చాలా హ్యాపీగా ఉన్న శ్రియ కూడా క్రిష్ కు తోడైంది. వీళ్లిద్దరూ కలిసి సంక్రాంతి సంబరాల్లో భాగంగా మేడెక్కి పతంగులు ఎగరేస్తూ ఎంజాయ్ చేశారు. వీరికి ‘గౌతమీపుత్ర శాతకర్ణి’ యూనిట్ సభ్యులు కూడా కొందరు తోడయ్యారు. అందరూ కలిసి గాల్లో తేలిపోతున్న ఫీలింగ్ లో కనిపించారు. ఓవైపు ‘గౌతమీపుత్ర శాతకర్ణి’ విజయాన్ని ఆస్వాదిస్తూనే.. సినిమాను మరింత పెద్ద స్థాయికి తీసుకెళ్లేందుకు ప్రమోషన్ కూడా గట్టిగానే చేస్తోంది క్రిష్ బృందం. క్రిష్.. శ్రియ టీవీ ఛానెళ్లకు తిరుగుతున్నారు. రేడియో స్టేషన్లలో సందడి చేస్తున్నారు. ప్రింట్.. వెబ్ మీడియాలకూ ఇంటర్వ్యూలిస్తున్నారు. మొత్తానికి ఇంకో వారం రోజుల పాటు వీరు ‘శాతకర్ణి’తోనే ట్రావెల్ చేయబోతున్నారు.



Like Us on Facebook : https://www.facebook.com/Tupakidotcom/