క్రిష్ ఫ్రెండ్లీ వార్నింగ్ విన్నారా?

వినయం.. విధేయత.. ఎంత ఎదిగినా ఒదిగి ఉండటం..వీటన్నింటికి తోడు చురుకుదనం దర్శకుడు క్రిష్ సొంతం. శాతకర్ణి సక్సెస్ తో మాంచి జోరు మీదున్నారు. అగ్రహీరో చిత్ర విజయంలో దర్శకుడికి భారీ ఎత్తున క్రెడిట్ దక్కటం చాలా అరుదుగా జరుగుతుంటుంది. అలాంటి అవకాశం వచ్చినా.. నేర్పుగా ఆ పేరు ప్రఖ్యాతుల్ని హీరో ఖాతాలో జమ చేస్తూ.. అందరి మనసుల్ని దోచుకుంటున్నారు క్రిష్.

తాజాగా మాట్లాడిన క్రిష్.. ఊహించని రీతిలో ఇండస్ట్రీకి ఫ్రెండ్లీ వార్నింగ్ ఇచ్చేశారు. ఫలానా సినిమా ఫలానా ఇండస్ట్రీ వాళ్లు మాత్రమే తీయగలరని.. ఫలానా సినిమాల్ని ఫలానా ప్రేక్షకులు మాత్రమే చూస్తారంటూ చాలామంది చాలానే విశ్లేషణలు చేస్తుంటారు. ఇలాంటివన్నీ వదిలేయాలన్న మాట చెప్పి.. తాను సాధించిన విజయాన్నిచెప్పుకొచ్చారు. అదే క్రమంలో అసలు విషయాన్ని సూటిగా చెప్పేశారు.

‘‘శాతకర్ణి లాంటి సినిమాలు హిందీలోనే వస్తాయి. అక్కడైతేనే ఒప్పుకుంటారు. తమిళంలో అయితేనే ఆదరణ పొందుతుంటాయి. ఇలా రకరకాల మాటలు వినిపిస్తూ ఉంటాయి. అలా మాట్లాడుకొనే వాళ్లందరికీ స్నేహపూర్వకమైన హెచ్చరిక.. శాతకర్ణి విజయం. కథను మాత్రమే నమ్మి చేసిన ఈ సినిమాకు ప్రేక్షకులు బ్రహ్మరథం పట్టారు. తెలుగు ప్రేక్షకుల అభిరుచికి అద్దం పట్టిన విజయమిది. వారి అభిరుచి మీద నమ్మకంతోనే చేసిన సినిమా ఇది’’ అని చెప్పటం ద్వారా.. ఎవరికి వారు తమకు తోచిన జడ్జిమెంట్ ను ప్రేక్షకుల పేరిట ఇవ్వొద్దన్న మెసేజ్ ను ఇచ్చేశారు. తెలుగు ప్రేక్షకుల అభిరుచి విషయంలో క్రిష్ మాటల్లో నిజం ఉందన్న విషయం శాతకర్ణి చిత్రమే కాదు.. సంక్రాంతి సందర్భంగా విడుదలైన మూడు సినిమాల విజయవంతం కావటమే నిదర్శనంగా చెప్పక తప్పదు.

Like Us on Facebook : https://www.facebook.com/Tupakidotcom/