క్రిష్ - వైష్ణవ్ సినిమా టైటిల్ అండ్ ఫస్ట్ లుక్ అప్డేట్..!

మెగా సెన్సేషన్ పంజా వైష్ణవ్ తేజ్ తన ఫస్ట్ సినిమా 'ఉప్పెన' తో బ్లాక్ బస్టర్ సక్సెస్ అందుకుని వరుస సినిమాలతో దూసుకుపోతున్నాడు. ఈ క్రమంలో జెట్ స్పీడ్ లో అద్భుతమైన క్వాలిటీతో సినిమాలు రూపొందించే క్రియేటివ్ డైరెక్టర్ క్రిష్ జాగర్లమూడి దర్శకత్వంలో తన రెండో మూవీ చేసే అవకాశం అందుకున్నాడు. సన్నపురెడ్డి వెంకట రామిరెడ్డి రాసిన నవల ఆధారంగా ఈ సినిమా రూపొందుతోంది. ఇదొక అద్భుతమైన అడ్వెంచర్ చిత్రమని మేకర్స్ చెబుతున్నారు. ఇందులో వైష్ణవ్‌ సరసన రకుల్‌ ప్రీత్‌ సింగ్‌ హీరోయిన్ గా నటించింది.

ఇప్పటికే చిత్రీకరణ పూర్తిచేసుకున్న ఈ సినిమా ప్రస్తుతం నిర్మాణాంతర కార్యక్రమాలు జరుపుకుంటోంది. అక్టోబర్ 8న ఈ చిత్రం ప్రేక్షకుల ముందుకు తీసుకొస్తున్నట్టు ఇటీవలే చిత్ర నిర్మాతలు ప్రకటించారు. ఈ నేపథ్యంలో ప్రమోషన్స్ మొదలు పెడుతున్న మేకర్స్.. తాజాగా ఓ చిన్న వీడియో విడుదల చేస్తూ సినిమా టైటిల్‌ అండ్ ఫస్ట్ లుక్ అప్‌డేట్ ఇచ్చారు. ఆగస్టు 20న ఉదయం 10:15 గంటలకు విడుదల టైటిల్ & ఫస్ట్ లుక్ రిలీజ్ చేయనున్నట్లు వెల్లడించారు.

ఈ వీడియో కొద్ది మంది అడవిలో నడుచుకుంటూ వెళ్లడం కనిపిస్తోంది. ఇది ఫారెస్ట్ బ్యాక్ డ్రాప్ లో సెట్ చేయబడిన కథ అని తెలుస్తోంది. సినిమాటోగ్రాఫర్ జ్ఞాన శేఖర్ చిత్రీకరించిన విజువల్స్ చాలా ఆహ్లాదకరంగా కనిపిస్తున్నాయి. దీనికి మ్యూజిక్ డైరెక్టర్ MM కీరవాణి అందించిన నేపథ్య సంగీతం ఆకట్టుకుంటుంది. కీరవాణి పాటలు - BGM మరియు జ్ఞాన శేఖర్ కెమెరా పనితనం సినిమాకు ప్రధాన ఆకర్షణగా నిలవబోతున్నాయని ఈ వీడియో హింట్ ఇస్తోంది.

బిబో శ్రీనివాస్ సమర్పణలో ఫస్ట్ ఫ్రేమ్ ఎంటర్‌టైన్‌మెంట్స్ బ్యానర్‌ పై సాయిబాబు జాగర్లమూడి మరియు రాజీవ్ రెడ్డి ఈ చిత్రాన్ని నిర్మిస్తున్నారు. ఈ సినిమాకి శ్రవణ్ కటికనేని ఎడిటింగ్ వర్క్ చేస్తుండగా.. రాజ్ కుమార్ గిబ్సన్ ఆర్ట్ డైరెక్టర్ గా వర్క్ చేస్తున్నారు. ఈ చిత్రానికి సంబంధించిన ఇతర వివరాలు ఈ నెల 20న వెల్లడికానున్నాయి.