నక్షత్రం టీం కౌంటర్ ఇచ్చింది

నక్షత్రం.. ఏడాది కిందట మొదలైన సినిమా. దాని స్కేల్ ప్రకారం చూస్తే ఈ పాటికి రిలీజైపోవాల్సింది. కానీ ఇప్పటిదాకా విడుదలకు నోచుకోలేదు. కనీసం విడుదలకు సిద్ధమవుతున్న సూచనలు కూడా కనిపించలేదు. మూణ్నాలుగు నెలలుగా ఈ సినిమా అసలు వార్తల్లోనే లేదు. దీంతో మీడియాలో ఈ సినిమా గురించి ప్రతికూల కథనాలు మొదలయ్యాయి. కొందరు మరీ ముందుకెళ్లిపోయి లేని పోని ఊహాగానాలు పుట్టించేశారు. ఈ సినిమా బడ్జెట్ హద్దులు దాటిపోయిందని.. బిజినెస్ పరంగా వర్కవుట్ కాదని సినిమాను మధ్యలోనే వదిలేశారని.. ఇక అది విడుదలకే నోచుకోదని రకరకాల ప్రచారాలు పుట్టించారు.

ఐతే ‘నక్షత్రం’ టీం ఈ ప్రచారానికి కౌంటర్ ఇచ్చింది. తమ సినిమా షూటింగ్ చివరి దశలో ఉందని.. డబ్బింగ్ కూడా జరుగుతోందని.. మిగతా పోస్ట్ ప్రొడక్షన్ కార్యక్రమాలు కూడా అవుతున్నాయని.. ఒక్క పాట చిత్రీకరణ మినహా సినిమా పూర్తయిందని చిత్ర వర్గాలు వెల్లడించాయి. మేలోనే ఈ చిత్రాన్ని రిలీజ్ చేయడానికి సన్నాహాలు కూడా జరుగుతున్నట్లు చెప్పారు. సోషల్ మీడియాలో ఈ సినిమాకు సంబంధించిన కొత్త సమాచారాన్ని పంచుకున్నారు. ‘నక్షత్రం’ మీద ఒకప్పుడు ఉన్నంత హైప్ ఇప్పుడు లేని మాట వాస్తవమే కానీ.. సందీప్ కిషన్.. సాయిధరమ్ తేజ్.. రెజీనా.. ప్రగ్యా జైశ్వాల్.. జేడీ చక్రవర్తి.. ప్రకాష్ రాజ్ లాంటి ప్రముఖ తారాగణం నటించిన సినిమా మీద ఆశల్లేక పక్కన పెట్టేశారు అన్న ప్రచారం మాత్రం టూమచ్. మరి ఈ చిత్ర బృందం చెబుతున్నట్లు మేలోనే సినిమాను రిలీజ్ చేసి.. ఇప్పుడు జరుగుతున్న ప్రచారానికి తెరదించుతారేమో చూద్దాం.

Like Us on Facebook : https://www.facebook.com/Tupakidotcom/