'కృష్ణ వ్రింద విహారి' రొమాంటిక్ పోజ్: శౌర్య ఒడిలో ఒదిగిపోయిన షెర్లీ..!

యంగ్ అండ్ ప్రామిసింగ్ హీరో నాగశౌర్య హిట్టు ప్లాపులతో సంబంధం లేకుండా వరుసగా సినిమాలు చేసుకుంటూ వస్తున్నారు. గతేడాది ద్వితీయార్థంలో 'వరుడు కావలెను' 'లక్ష్య' చిత్రాలతో ప్రేక్షకులను పలకరించిన శౌర్య.. ఇప్పుడు ''కృష్ణ వ్రింద విహారి'' అంటూ వస్తున్నాడు.

శౌర్య హోమ్ ప్రొడక్షన్ ఐరా క్రియేషన్స్ పతాకంపై అనీష్ ఆర్ కృష్ణ దర్శకత్వంలో ''కృష్ణ వ్రింద విహారి'' సినిమా తెరకెక్కుతోంది. రొమాంటిక్ ఫ్యామిలీ అండ్ కామెడీ ఎంటర్టైనర్ గా రూపొందుతున్న ఈ చిత్రంలో నాగశౌర్య ఒక బ్రాహ్మణ కుర్రాడిగా కనిపించనున్నారు. కుర్ర భామ షెర్లీ సెటియా హీరోయిన్ గా నటిస్తోంది.

ఇప్పటికే ఈ సినిమా షూటింగ్ పార్ట్ పూర్తి చేసుకుంది. పోస్ట్ ప్రొడక్షన్ పనులు కూడా శరవేగంగా జరుగుతున్నాయి. ఆ మధ్య విడుదలైన ఫస్ట్‌ లుక్‌ పోస్టర్ కి మంచి రెస్పాన్స్ వచ్చింది. ఈ నేపథ్యంలో చిత్ర బృందం తాజాగా టీజర్‌ కి సంబంధించిన అప్‌డేట్‌ ఇచ్చారు.

'కృష్ణ వ్రింద విహారి' సినిమా టీజర్‌ ను మార్చి 28 సోమవారం రిలీజ్ చేయనున్నట్లు మేకర్స్ ప్రకటించారు. ఈ సందర్భంగా ఓ బ్యూటిఫుల్ పోస్టర్ ని వదిలారు. ఇందులో నాగ శౌర్య మరియు షిర్లీ సెటియా రొమాంటిక్ పోజ్‌ లో కనిపిస్తున్నారు. పోస్టర్ ని బట్టి చూస్తే, సినిమాలో వీరిద్దరూ అద్భుతమైన కెమిస్ట్రీ ని పంచుకున్నట్లు కనిపిస్తోంది.

అలనాటి నటి రాధిక శరత్ కుమార్ ఈ చిత్రంలో ఒక ముఖ్యమైన పాత్రలో నటిస్తున్నారు. వెన్నెల కిషోర్ - రాహుల్ రామకృష్ణ - బ్రహ్మజీ - సత్య తదితరులు ఇతర పాత్రలు పోషించారు. శంకర్ ప్రసాద్ మల్పూరి సమర్పణలో ఉషా మల్పూరి ఈ చిత్రాన్ని నిర్మిస్తున్నారు. బుజ్జి సహ నిర్మాతగా వ్యవహరిస్తున్నారు.

మహతి స్వర సాగర్ సంగీతం సమకూరుస్తున్నారు. సాయి శ్రీరామ్ సినిమాటోగ్రఫీ అందిస్తుండగా.. తమ్మిరాజు ఎడిటింగ్ వర్క్ చేస్తున్నారు. రామ్‌ కుమార్ ఆర్ట్ డైరెక్టర్ గా వ్యవహరిస్తున్నారు. 'కృష్ణ వ్రింద విహారి' చిత్రాన్ని వేసవి కానుకగా ఏప్రిల్ 22న ప్రపంచ వ్యాప్తంగా విడుదల కానుంది.