ట్రైలర్ టాక్: కుమ్మేశావ్ కృష్ణార్జునా..

యంగ్ హీరో నాని సినిమా అంటేనే మినిమం గ్యారంటీ కాదు.. ఇప్పుడు మ్యాగ్జిమం గ్యారంటీ అయిపోయింది. న్యాచురల్ స్టార్ మూవీ అంటే చాలు.. జనాలు ఇరగబడి థియేటర్లకు వచ్చేస్తున్నారు. స్టార్ రేంజ్ ను తాను రీచ్ అయిపోయానని ఇప్పటికే ప్రూవ్ చేసేసుకున్న నాని.. ఇప్పుడు కృష్ణార్జున యుద్ధం అంటూ కొత్త సినిమాతో ఆడియన్స్ ముందుకు వచ్చేస్తుండగా.. ఇప్పుడీ మూవీకి థియేట్రికల్ ట్రైలర్ కూడా రిలీజ్ చేసేశారు.

కృష్ణార్జున యుద్ధం ట్రైలర్ ద్వారా కథ ఏంటి అనే విషయాన్ని చెప్పేశారు. సినిమాకు ఇద్దరు హీరోలు.. ఇద్దరూ నానీలే. పల్లెటూరిలో ఉండే కృష్ణ.. సిటీ గై అర్జున్. కనిపించిన అమ్మాయికల్లా సైట్ కొట్టి తిట్లు తినడం కృష్ణకు అలవాటు. పెళ్లి చేసుకుంటావా అని అడిగిన అమ్మాయి చెప్పు చూపిస్తే.. 'చెప్పు మాత్రమే చూపించిందంటే.. ఈ అమ్మాయి ఊరికి కొత్తనుకుంటా' అంటాడు కృష్ణ. అదీ ఈ పాత్ర క్యారెక్టర్. 'ఒక అమ్మాయిని సిన్సియర్ గా ప్రేమించడం.. ఇటాలియన్ మాఫియాతో పెట్టుకోవడం రెండూ ఒకటే' అంటాడు అర్జున్ పాత్రలోని నాని.

అలాంటి ఈ ఇద్దరు చెరో అమ్మాయిని తెగ ప్రేమించేస్తారు. ఆ తర్వాత వారి ప్రేమలకు ఎలాంటి కష్టాలు వచ్చాయి. పల్లెటూరి నాని.. సిటీ నానికి కూడా ఎలా హెల్ప్ చేశాడు.. అన్నదే సినిమా. ఈ మూవీలో కూడా క్లీన్ కామెడీనే అందించబోతున్నాడు నాని. 'సిగరెట్ యాడ్ లో ద్రావిడ్ లాగా అర్ధం కాకుండా మాట్లాడుతున్నాడేంట్రా' అంటూ సైడ్ క్యారెక్టర్ పేల్చిన జోక్ బాగా పేలింది.

కృష్ణ పాత్రలో చిత్తూరు యాస.. సిటీ హీరోగా పోష్ లాంగ్వేజ్ రెండింటినీ నాని ఇరగదీసేశాడు. ట్రైలర్ లో అనుపమా పరమేశ్వరన్.. రుష్కర్ ధిల్లాన్ అంటూ ఇద్దరు హీరోయిన్స్ కనిపిస్తున్నా.. కళ్లు వాళ్ల మీదకు మళ్లవు అంటే.. నాని ఏ రేంజ్ లో పండించేశాడో అర్ధమవుతుంది. హిప్ హాప్ తమిళ అందించిన సంగీతంతో దర్శకుడు మేర్లపాక గాంధీ మాంచి ట్రీట్ నే ఇవ్వబోతున్నాడని చెప్పచ్చు.

వీడియో కోసం క్లిక్ చేయండి