ఆ యువ నటితో డ్యాన్స్..కాలేజీ రోజుల్ని గుర్తు చేసిందట

ప్రత్యేకంగా పరిచయం చేయాల్సిన అవసరం లేని నట దిగ్గజం.. బిగ్ బి అమితాబ్ బచ్చన్. తెర మీదన నటనతోపాటు.. రియాలీ షోలకు సరికొత్త ఇమేజ్ ను తీసుకురావటమే కాదు.. అగ్ర హీరోలు సైతం వాటిల్లో పాల్గొనేలా చేయటంలో అమితాబ్ పాత్ర కీలకమని చెప్పాలి. ‘కౌన్ బనేగా కరోడ్ పతి’ షో ప్రారంభమయ్యే సమయానికి సినిమాల్లో బిజీగా ఉండే ఒక అగ్రనటుడు టీవీ షోలకు పని చేయటం ఊహకు అందని విషయం.

వెండి తెర మీద నుంచి బుల్లితెరకు షిఫ్టు కావటం డిమోషన్ కాదు ప్రమోషన్ అన్న విషయాన్ని తేల్చటంతో పాటు.. దాని మార్కెట్ ను పెంచేందుకు.. తద్వార తమ ఇమేజ్ ను మరింత బిల్డ్ చేసుకోవటానికి మాధ్యమంగా మారుతుందన్న విషయాన్ని చేతల్లోనిరూపించిన హీరోగా ఆయన్ను చెప్పాలి. ఆయన సిగ్నేచర్ మార్క్ తో కౌన్ బనేగా కరోడ్ పతి షోకు సరికొత్త ఇమేజ్ ను తీసుకురావటంలో సక్సెస్ అయ్యారు.

తాజాగా ఈ షోకు ముఖ్య అతిధిగా హాజరైంది క్యూట్ బ్యూటీ కృతి సనన్. ఆమె నటించిన ‘హమ్ దో హమారే దో’ మూవీ ప్రమోషన్స్ కోసం హాజరైన సందర్భంగా ఆమె.. బిగ్ బితో కలిసి బాల్ రూమ్ డ్యాన్స్ చేశారు. రెడ్ కలర్ పొడవైన గౌన్ లో కృతి.. బ్లాక్ సూట్ లో అమితాబ్ లు చేసిన డ్యాన్స్ అదిరేలా ఉంది. 79 ఏళ్ల వయసులో.. యంగ్ బ్యూటీతో సరి సమానంగా డ్యాన్స్ చేయటం అమితాబ్ కు మాత్రమే చెల్లుతుందేమో.

దీనికి సంబంధించిన ఫోటోను తన సోషల్ మీడియా ఖాతాలో షేర్ చేసిన అమితాబ్.. ఆసక్తికర వ్యాఖ్య చేశారు. కృతితో తాను చేసిన బాల్ రూమ్ డ్యాన్స్.. తన కాలేజీ రోజుల్ని.. కోల్ కతాలో తాను గడిపిన క్షణాల్ని గుర్తుకొచ్చేలా చేశాయన్నారు. ఇండస్ట్రీకి రావటానికి ముందు బిగ్ బి.. కోల్ కతాలోని కంపెనీలో బిజినెస్ ఎగ్జిక్యూటివ్ గా పని చేసిన విషయం తెలిసిందే. వయసు పెరుగుతున్న కొద్దీ ఆయన చేస్తున్న సినిమాల జాబితా పెరుగుతూనే ఉంది. ప్రస్తుతం ఆయన హాలీవుడ్ చిత్రంతో పాటు.. మరో మూడు సినిమాల్లో నటిస్తున్నారు.