అమ్మడికే ఆఫర్స్ లేవు.. ఇక చెల్లెలిని ప్రమోట్ చేస్తుందట...!

సూపర్ స్టార్ మహేష్ '1 - నేనొక్కడినే' చిత్రంతో హీరోయిన్ గా పరిచయమైంది కృతి సనన్. అందాల మెరుపు తీగలా కనిపించే హీరోయిన్ కృతి సనన్ మోడలింగ్ నుంచి సినిమాల్లోకి ఎంట్రీ ఇచ్చింది. తొలి చిత్రంలోనే సూపర్ స్టార్ మహేష్ బాబు సరసన నటించే ఛాన్స్ కొట్టేసింది. ఆ చిత్రం నిరాశపరచినప్పటికీ కృతి నాజూకు అందాలు ఆడియన్స్ ని బాగా ఆకట్టుకున్నాయి. ఆ తర్వాత నాగచైతన్య సరసన 'దోచెయ్' చిత్రంలో నటించగా అది కూడా నిరాశపరిచింది. రెండు వరుస పరాజయాలు పలకరించడంతో మన టాలీవుడ్ లో అమ్మడికి అవకాశాలు లేకుండా పోయాయి. ఇక ఇక్కడ లాభం లేదని భావించిన కృతి సనన్ బాలీవుడ్ కి చెక్కేసింది. బాలీవుడ్ లో 'హీరోపంటి' 'దిల్ వాలే' 'లూకా చుప్పి' 'బరేలీకి బర్ఫీ' 'పానిపట్' 'హౌస్ ఫుల్ 4' లాంటి సూపర్ హిట్ చిత్రాలతో మంచి క్రేజీ హీరోయిన్ గా మారిపోయింది. కృతి సనన్ గ్లామర్ రోల్స్ చేస్తూనే నటనకు ప్రాధాన్యత ఉన్న చిత్రాలని ఎంచుకుంటోంది.

అయితే ఈ హాట్ బ్యూటీకి నుపుర్ సనన్ అనే చెల్లెలు ఉంది. నుపుర్ ఒక ప్రైవేట్ ఆల్బమ్ ద్వారా ఫేమస్ అయింది. ఇప్పుడు ఈ నాజూకు భామ తన చెల్లెలు నుపుర్ ని కూడా సినీ ఇండస్ట్రీకి పరిచయం చేయాలని చేస్తోందట. ఈ విషయం గురించి కృతిని అడుగగా 'నుపూర్ నా కన్నా చాలా టాలెంటెడ్.. తన కెరీర్లో ఖచ్చితంగా చాలా దూరం వెళ్తుందని' చెప్పిందట. ఈ విషయం తెలిసిన నెటిజన్లు 'అమ్మడికే ఇక్కడ అవకాశాల్లేవు ఇక చెల్లిని కూడా ప్రమోట్ చేస్తోందా' అంటూ కామెంట్స్ చేస్తున్నారట. అంతేకాకుండా 'ఫస్ట్ నీ టాలెంట్ ఏంటో చూపించు.. తర్వాత నీ చెల్లెలి టాలెంట్ గురించి చెప్పొచ్చులే' అంటూ సోషల్ మీడియా వేదికగా కామెంట్స్ చేస్తున్నారట. మరి కృతి సనన్ చెల్లెలు నుపూర్ సనన్ ఇండస్ట్రీలో అడుగుపెట్టి ఎంత దూరం పోబోతుందో చూడాలి. ఇదిలా ఉండగా కృతి సనన్ చేతిలో ప్రస్తుతం ఒకే ఒక సినిమా 'మిమి' ఉంది. అయితే సుశాంత్ సింగ్ రాజ్ పుత్ తో కృతి సనన్ లవ్ లో పడిందనే పుకార్లతో ఎప్పుడు వార్తల్లో నిలుస్తూ వస్తోంది.