మెగా కితాబు కొట్టేసిన 'ఉప్పెన' పిల్ల!

తెలుగు తెరకి ప్రతియేటా కొత్త హీరోయిన్లు చాలామందే పరిచయమవుతుంటారు. అందులో కంటెంట్ ఉన్నవారు తారా జువ్వలా దూసుకుపోతారు .. లేనివారు చిచ్చుబుడ్డిలా అక్కడే ఉండిపోతారు. ఇక ఈ ఏడాది తెలుగు తెరకి పరిచయమవుతున్న హీరోయిన్లలో కృతి శెట్టి ఒకరుగా కనిపిస్తుంది. 'ఉప్పెన' సినిమా ద్వారా ఈ పిల్ల ప్రేక్షకులను పలకరించనుంది. లవర్స్ డే సందర్భంగా ఈ సినిమా ఈ నెల 12వ తేదీన ప్రేక్షకుల ముందుకు రానుంది. ఆ రోజున 'ఉప్పెన'లా థియేటర్లను ముంచెత్తడానికి కుర్రాళ్లంతా కాచుకుని కూర్చున్నారు.

అంతగా యూత్ ఈ సినిమాపై దృష్టి పెట్టడానికి కారణం .. 'నీ కన్ను నీలి సముద్రం' అనే పాట .. ఆ పాటలో మెరిసే కృతి శెట్టి. నిజంగానే ఈ పిల్ల కుర్రాళ్ల మనసులను కుందేళ్లుగా మార్చి పట్టేసింది. గుప్పెడంత ఆకాశాన్ని చేతిలోకి తీసుకుని నీలాలు .. పగడాలు కలిపి చేసినట్టుగానే ఉంది. ఇక అభినయం కూడా అందంగానే ఉందనే విషయం ట్రైలర్ల ద్వారా .. పాట ద్వారా తెలుస్తూనే ఉంది. రీసెంట్ గా జరిగిన ఈ సినిమా ప్రీ రిలీజ్ ఈవెంట్ లో ఈ అమ్మాయి అభినయాన్ని మెగాస్టార్ అభినందించడం విశేషం.

చిరంజీవి మాట్లాడుతూ .. ఈ అమ్మాయితో చాలా చక్కగా నటించిందని చెప్పారు. నిర్మాతలు తొందరపడి బుక్ చేసుకోకపోతే, ఈ అమ్మాయి డేట్స్ దొరకడం కష్టమేనని అన్నారు. కాబోయో సూపర్ స్టార్ అని కూడా కితాబునిచ్చారు. ఎదుటివారిలో టాలెంట్ గుర్తించడం .. వాళ్లు ఏ స్థాయివరకూ వెళ్లగలుగుతారనేది చెప్పగలగడం చిరంజీవి ప్రత్యేకత. అందువలన తెలుగు తెరపై కృతి శెట్టి హవా కొనసాగే అవకాశాలు పుష్కలంగా కనిపిస్తున్నాయి. 'ఉప్పెన' కథాకథనాల మాటేమోగానీ, తెలుగు తెరపైకి ఈ అమ్మాయి ఒక 'ఉప్పెన' మాదిరిగానే వచ్చిందనుకోవాలి.