కొత్త సినిమాతో వస్తున్న క్షణం దర్శకుడు!

ఒక్కోసారి సినిమా సూపర్ హిట్ అయినా ఆ సినిమాకు పని చేసినవారికి పెద్దగా క్రెడిట్ రాదు. కెరీర్ కూడా టేకాఫ్ కాదు. 'క్షణం' సినిమాతో సంచలన విజయం సాధించిన దర్శకుడు రవికాంత్ పేరెపు పరిస్థితి కూడా అంతే. ఆ సినిమాకు రవికాంత్ దర్శకుడు అయినప్పటికీ ఎక్కువ క్రెడిట్ అడివి శేష్ కు వెళ్లిపోయింది. హీరోగానే కాకుండా స్క్రిప్ట్ వర్క్ లో.. మేకింగ్ లో శేష్ ప్రమేయం ఉండడంతో ఎక్కువ క్రెడిట్ శేష్ కే వెళ్తోందని అంటున్నారు.

'క్షణం' తర్వాత ఇన్ని రోజులకు దర్శకుడు రవికాంత్ ఒక సినిమాను తెరకెక్కించాడు. సినిమా టైటిల్ 'కృష్ణ అండ్ హిస్ లీల'. 'గుంటూరు టాకీస్' ఫేమ్ సిద్దు ఇందు లో హీరోగా నటిస్తున్నాడు. ఈ సినిమా లో శ్రద్ధ శ్రీనాథ్.. సీరత్ కపూర్.. శాలిని హీరోయిన్లుగా నటిస్తున్నారు. తాజాగా ఈ సినిమా టైటిల్ లోగో పోస్టర్ రిలీజ్ చేశారు. పోస్టర్ అయితే కలర్ఫుల్ గా ఉంది. 'పుకార్ల ఆధారంగా' అని క్యాప్షన్ ఇస్తూ 'కృష్ణ అండ్ హిస్ లీల' అనే టైటిల్ ను ఇవ్వడం ఆసక్తికరంగా ఉంది. ఈ సినిమాను సురేష్ ప్రొడక్షన్స్.. వయకాం 18 మోషన్ పిక్చర్స్ సంయుక్తంగా నిర్మిస్తున్నారు. రానా దగ్గుబాటి ఈ సినిమాను సమర్పిస్తున్నారు.

ఈ సినిమా హీరో సిద్ధూ రవికాంత్ తో పాటు సహ రచయితగా వ్యవహరించాడు. మరి ఈ సినిమాతో అయినా రవికాంత్ కు క్రెడిట్ వస్తుందా అనేది వేచి చూడాలి. ఈ సినిమా ఏ జోనర్ లో తెరకెక్కుతోంది లాంటి ఇతర వివరాలు త్వరలోనే తెలుస్తాయి.