అడ్రస్ లేని సినిమా.. సడెన్ రిలీజ్

కుందనపు బొమ్మ అనే పేరుతో తెలుగులో ఓ సినిమా మొదలవడం.. పూర్తవడం.. దాని ఆడియో వేడుకను కూడా అంగరంగ వైభవంగా నిర్వహించడం గుర్తుండే ఉంటుంది. ఇక విడుదలే తరువాయి అనుకుంటుండగా అడ్రస్ లేకుండా పోయిందా సినిమా. లెజెండరీ రైటర్ ముళ్లపూడి రమణ తనయుడు, -లెజెండరీ డైరెక్టర్ బాపు అల్లుడు అయిన వర ముళ్లపూడి దర్శకత్వం వహించిన ఈ సినిమాను దర్శకేంద్రుడు రాఘవేంద్రరావు సమర్పించడం.. కీరవాణి సంగీతాన్నందించడం విశేషం. ఇంతమంది ప్రముఖుల హ్యాండ్ ఉన్న సినిమా అలా కనుమరుగైపోవడం ఆశ్చర్యం కలిగించే విషయమే. ఐతే ఈ చిత్రాన్ని ఉన్నట్లుండి విడుదలకు సిద్ధం చేస్తున్నారు. ఈ నెల 24న ‘ఒక మనసు’కు పోటీగా ‘కుందనపు బొమ్మ’ను రిలీజ్ చేస్తున్నారు.

చాందిని చౌదరి టైటిల్ రోల్ చేస్తున్న ఈ సినిమాలో ‘లైఫ్ ఈజ్ బ్యూటిఫుల్’ ఫేమ్ సుధాకర్ పాటు ఓ కొత్తబ్బాయి హీరోలుగా నటించారు. తనికెళ్ల భరణి నరేషన్లో ట్రైలర్ రిలజీ్ చేసి.. సినిమా విడుదల తేదీ ప్రకటించారు. సినిమాలో కొంచెం బాపు.. వంశీల స్టయిల్ కనిపిస్తోంది. నిరంజన్-అనిల్-వంశీ ఈ చిత్రాన్ని నిర్మించారు. ఎన్టీఆర్ మూవీ ‘నా అల్లుడు’తో దర్శకుడిగా పరిచయమైన వర ముళ్లపూడికి ఆ సినిమా ఎలాంటి ఫలితాన్నిచ్చిందో కొత్తగా చెప్పాల్సిన పని లేదు. ఆ తర్వాత ‘విశాఖ ఎక్స్ ప్రెస్’ అనే చిన్న సినిమా ఒకటి ట్రై చేశాడు కానీ.. అదీ నిరాశనే మిగిల్చింది. ఇప్పుడిక చాలా గ్యాప్ తర్వాత ‘కుందనపు బొమ్మ’తో మళ్లీ అదృష్టాన్ని పరీక్షించుకుంటున్నాడు. మరి ఈసారి ఏమవుతుందో చూద్దాం.