IPL ఫైన‌ల్లో నాగచైత‌న్య మూవీ ట్రైల‌ర్ లాంచ్

క్రికెట్ ల‌వ‌ర్స్ కి ఐపీఎల్ ఎప్పుడూ ఉత్కంఠ క‌లిగించేదే. ఈసారి ఐపీఎల్ ర‌స‌వ‌త్త‌రంగా సాగుతోంది. అంతేకాదు.. ఐపీఎల్ ఫైనల్లో పాపుల‌ర్ స్టార్ న‌టించిన మూవీ ట్రైల‌ర్ విడుద‌ల కానుంది. ఈ వార్త విన్న వెంట‌నే అభిమానుల్లో ఒక‌టే ఆనందం. ఇంత‌కీ ఇది ఏ మూవీ ట్రైల‌ర్? స్టార్లు ఎవ‌రు? అంటే.. వివ‌రాల్లోకి వెళ్లాలి.

మిస్ట‌ర్ ప‌ర్ఫెక్ట్ అమీర్ ఖాన్ ప్ర‌స్తుతం హాలీవుడ్ చిత్రం ఫారెస్ట్ గంప్ (1994) రీమేక్ లో న‌టిస్తున్న‌ సంగ‌తి తెలిసిందే. లాల్ సింగ్ చద్దా అనేది టైటిల్.. ప్రముఖ నటుడు టామ్ హాంక్స్ ప్రధాన పాత్రలో నటించిన‌ ఫారెస్ట్ గంప్ చిత్రం ఇప్పటికీ హాలీవుడ్ సినిమాలో క్లాసిక్‌గా మ‌న్న‌న‌లు అందుకుంటోంది. ఈ మూవీ రీమేక్ `లాల్ సింగ్ చ‌ద్దా`కు అద్వైత్ చందన్ దర్శకత్వం వహిస్తున్నారు. ఈ చిత్రంలో టాలీవుడ్ యువ‌హీరో నాగ చైతన్య కీలక పాత్రలో నటించ‌గా క‌రీనా మ‌రో ప్ర‌ధాన పాత్ర‌లో న‌టించారు. ప్ర‌స్తుతం లాల్ సింగ్ చద్దా నిర్మాణానంత‌ర ప‌నులు సాగుతున్నాయి. త్వ‌ర‌లోనే మూవీ విడుద‌ల కానుంది.

ఇంత‌లోనే `లాల్ సింగ్ చద్దా` ట్రైలర్ లాంచ్ చేయడానికి అమీర్ ఖాన్ - నాగ‌చైత‌న్య బృందం వేదిక‌ను ఫిక్స్ చేసి సిద్ధంగా ఉన్నార‌ని తెలిసింది. అమీర్ ఖాన్ ఈవెంట్ హోస్ట్ గా బిగ్ నైట్ కోసం సన్నాహాలు చేస్తుండ‌డం ఉత్కంఠ‌ను పెంచుతోంది. అయితే ట్రైల‌ర్ లాంచ్ కి స‌రైన వేదిక‌ను అమీర్ ఎంపిక చేసుకున్నారా? అంటే అవున‌నే తెలుస్తోంది. మే 29న ఐపీఎల్ ఫైనల్ సెకండ్ టైమ్ అవుట్ లో మొదటి ఇన్నింగ్స్ లో ఎంతో ఆసక్తిగా ఎదురుచూస్తున్న సినిమా ట్రైలర్ లాంచ్ కానుంది. అలాగే లాల్ సింగ్ చద్దా లో నటించిన అమీర్ ఖాన్ స్వ‌యంగా ఈ ఈవెంట్ కు యాంకరింగ్ చేయనున్నట్లు తెలుస్తోంది.

`లాల్ సింగ్ చద్దా` నిర్మాతలు పంచుకున్న వీడియోల్లో వివ‌రాల ప్ర‌కారం.. అమీర్ ఖాన్ స్వ‌యంగా హర్భజన్ సింగ్ సహా ప్రపంచ ప్రఖ్యాత క్రికెటర్లతో సంభాషణలు నిర్వహించే ఈవెంట్ ను కూడా నిర్వహిస్తున్నారని తెలుస్తోంది. ఇది నిజంగా అభిమానుల‌కు కిక్కు పెంచే వార్త అని చెప్పాలి. ఆస‌క్తిక‌రంగా హర్భజన్ ని అమీర్ ఇంట‌ర్వ్యూ చేస్తారు. ఇందులో ఎలాంటి ప్రశ్నలు అడగాలి అనే దానిపై టీవీ ఛానెల్ లోని సిబ్బంది నుండి చిట్కాలు తీసుకుంటూ అమీర్ క‌నిపించారు. అమీర్ తన ఇంటర్వ్యూ నైపుణ్యాలను మెరుగుల‌ద్దుతున్నారు. దేశీ టెలివిజన్ లో మెగా క్రికెట్ ఈవెంట్ లో త‌న త‌దుప‌రి చిత్రం లాల్ సింగ్ చ‌ద్దా ట్రైలర్ ను విడుదల చేయడం ఇదే మొదటిసారి. క్రికెట్ .. సినీ ప్రేమికుల్లో ఉన్న ఉత్సాహం `లాల్ సింగ్ చద్దా`ని ఇంటర్నెట్ లో ఎక్కువగా సెర్చ్ చేసే అంశంగా మార్చేస్తోంది.

సాయంత్రం 6 గంటల నుంచి ఈ ఈవెంట్ ను అమీర్ ఖాన్ హోస్టింగ్ చేయనున్నారు. మే 29న స్టార్ స్పోర్ట్స్ నెట్ వర్క్ - డిస్నీ హాట్ స్టార్ లో ఈవెంట్ లైవ్ అవుతుంది. ఇది నిజంగా నాగ‌చైత‌న్య అభిమానుల‌కు కిక్కిచ్చే వార్తే. అయితే ఆ ఈవెంట్ కి చైత‌న్య అటెండ‌వుతున్నారా? లేదా? అన్న‌ది వేచి చూడాలి.