జక్కన్న శిష్యుడి సినిమా వచ్చేస్తోంది

నవంబరులో మిగిలిన రెండు వారాల్లో నాలుగు సినిమాలు రాబోతున్నాయి. ఇక డిసెంబర్ లో నాలుగు వారాలకు మూడు వారాల షెడ్యూళ్లు ఫిక్సయిపోయాయి. డిసెంబరు 4న శంకరాభరణం రాబోతోంది. 18న లోఫర్ అంటున్నారు. 25వ తేదీకి సౌఖ్యం - మామ మంచు అల్లుడు కంచు - ఎక్స్ ప్రెస్ రాజా లైన్లో ఉన్నాయి. ఇక ఈ నెలలో మిగిలిన డేటు ఒక్కటే. అదే.. డిసెంబరు 11. ఈ రోజు నాగచైతన్య సినిమా ‘సాహసం శ్వాసగా సాగిపో’ వస్తుందన్నారు. కానీ అప్పుడెప్పుడో టీజర్ ఒకటి వదిలారు తప్పితే.. సినిమాకు సంబంధించి అప్ డేట్స్ ఏమీ లేవు. ఆడియో కబురు కూడా ఏదీ వినిపించలేదు. కాబట్టి ఆ తేదీకి సినిమా రావడం డౌటే.

మరి ఖాళీగా పడ్డ డేటుని ఊరికే ఎలా వదిలేస్తారు. ఈ డేటుకి రాజమౌళి శిష్యుడు జగదీష్ తలసిల రూపొందించిన ‘లచ్చిందేవికి ఓ లెక్కుంది’ సినిమా కోసం ఆ డేటును ఫిక్స్ చేశారు. డిసెంబరు 11న ఈ సినిమాను రిలీజ్ చేయనున్నట్లు నిర్మాత సాయి ప్రసాద్ కామినేని ప్రకటించాడు. జగదీష్.. రాజమౌళి దగ్గర మగధీర, మర్యాద రామన్న, ఈగ సినిమాలకు పని చేశాడు. ఎల్ఓఎల్ అని షార్ట్ గా పిలుచుకుంటున్న ‘లచ్చిందేవికి ఓ లెక్కుంది’లో ‘అందాల రాక్షసి’ జంట నవీన్ చంద్ర, లావణ్య త్రిపాఠి జంటగా నటిస్తున్నారు. కీరవాణి సంగీతాన్నందించాడు. ఇది ఓ క్రైం కామెడీ. టీజర్, పోస్టర్లు చాలా క్రియేటివ్ గా ఉండటంతో సినిమాపై మంచి అంచనాలే ఉన్నాయి.