లేడీసూపర్‌ స్టార్‌ 'ప్రేమమ్‌'

లేడీ సూపర్‌ స్టార్‌ నయనతార సినిమాల జోరు కంటిన్యూ అవుతూనే ఉంది. ఏడాదికి అరడజను సినిమాల వరకు ఈమె ప్రేక్షకుల ముందుకు తీసుకు వస్తూనే ఉంది. ఒక వైపు రజినీకాంత్‌.. విజయ్ వంటి సూపర్‌ స్టార్‌ లతో నటిస్తూనే మరో వైపు మూకుత్తి అమ్మన్‌ వంటి లేడీ ఓరియంటెడ్‌ సినిమాలు చేస్తుంది.

ప్రస్తుతం ఈమె రజినీకాంత్‌ మూవీ అన్నాత్తేలో నటించడంతో పాటు ప్రియుడి దర్శకత్వంలో రూపొందుతున్న ఒక ముక్కోణపై ప్రేమ కథలో కూడా నటిస్తోంది. ఈ రెండు సినిమాలతో పాటు మరో రెండు కూడా చర్చల దశలో ఉన్నాయి. ఈ సమయంలోనే ఒక క్రేజీ మూవీలో ఈమె హీరోయిన్‌ గా ఎంపిక అయ్యింది. 'ప్రేమమ్‌' సినిమాతో అందరిని ఆకట్టుకున్న దర్శకుడు ఆల్ఫాన్స్‌ పుత్రెన్స్‌ దర్శకత్వంలో 'పాత్తు' అనే సినిమా రూపొందుతుంది. ఆ సినిమాలో నయన్‌ ను ఎంపిక చేశారట.

ఫహద్ ఫసిల్ హీరోగా రూపొందబోతున్న పాత్తు సినిమాలో నయనతార నటించబోతున్నట్లుగా యూనిట్‌ సభ్యుల ద్వారా సమాచారం అందుతోంది. ప్రేమమ్‌ సినిమాతో దేశ వ్యాప్తంగా దర్శకుడు ఆల్ఫాన్స్‌ మంచి పేరు దక్కించుకున్నాడు. ప్రస్తుతం ఈయన చేస్తున్న ఈ సినిమాను పలు భాషల్లో విడుదల చేయాలని భావిస్తున్నాడు. అన్ని భాషల్లో విడుదల చేసేవిధంగా సినిమాను రూపొందించాలనే అభిప్రాయంతో ఉన్నాడు.

మలయాళంలో రూపొందబోతున్న ఈ సినిమాకు తెలుగు మరియు తమిళంలో నయన్‌ వల్ల మంచి క్రేజ్ ఏర్పడటం ఖాయం. ఇక కన్నడం మరియు హిందీల్లో ఎలాగూ దర్శకుడికి ఉన్న పేరుతో మార్కెట్‌ అయ్యే అవకాశం ఉంది. కనుక పాత్తు సినిమా ఒక భారీ పాన్‌ ఇండియా మూవీగా నిలిచే అవకాశం ఉందంటున్నారు.