లగడపాటి ఓపెన్‌ ఛాలెంజ్‌

పోయిన శుక్రవారం విడుదలైన మూడు సినిమాలకూ పూర్తి పాజిటివ్‌ టాకేం రాలేదు. వినవయ్యా రామయ్యా, టిప్పు సినిమాలకు నెగెటివ్‌ టాక్‌ రాగా.. 'కృష్ణమ్మ కలిపింది ఇద్దరినీ' మిక్స్‌డ్‌ టాక్‌ తెచ్చుకుంది. వినవయ్యా రామయ్యా, టిప్పు సినిమాలకు సంబంధించి నెగెటివ్‌ రివ్యూలు రాసిన వాళ్లపై ఆ సినిమాల యూనిట్‌ సభ్యులు విలేకరుల సమావేశం పెట్టి మరీ విమర్శలు గుప్పించారు. ఆ రెండింటితో పోలిస్తే 'కృష్ణమ్మ కలిపింది ఇద్దరినీ'కి మంచి రివ్యూలే వచ్చినా.. నెగెటివ్‌ పాయింట్ల గురించి కూడా కొందరు హైలైట్‌ చేశారు. దీనిపై నిర్మాత లగడపాటి శ్రీధర్‌కు కోపం వచ్చింది. తన సినిమాపై నెగెటివ్‌ కామెంట్స్‌ చేసిన వారికి ఆయన ఓపెన్‌ ఛాలెంజ్‌ విసిరారు.

గురువారం మధ్యాహ్నం 3.15 గంటలకు ప్రసాద్‌ ఐమాక్స్‌లో 'కృష్ణమ్మ కలిపింది ఇద్దరినీ' స్పెషల్‌ షో వేస్తున్నామని.. ఆ తర్వాత విజయోత్సవ సభ కూడా నిర్వహిస్తామని.. సినిమా నచ్చినవాళ్లు తమ అభిప్రాయం చెప్పొచ్చని.. నచ్చలేదని చెప్పిన వాళ్లకు అక్కడే టికెట్‌ డబ్బులు వెనక్కి ఇచ్చేస్తామని ఆయన ఛాలెంజ్‌ చేశారు. సినిమా చూసిన వాళ్లు దాని మీద తమ అభిప్రాయం చెప్పడానికి ఓ వాట్సాప్‌ నంబర్‌ (8886084077) కూడా ఇచ్చారు శ్రీధర్‌. సినిమాపై నిక్కచ్చిగా తమ అభిప్రాయాల్ని ఈ నెంబర్‌కు వాట్సాప్‌ ద్వారా మెసేజ్‌ చేయొచ్చని ఆయనన్నారు. మరి ఆయన ఛాలెంజ్‌ను ఎంతమంది స్వీకరిస్తారో చూడాలి.