స్టార్ డమ్‌ కోసం.. బెగ్గ‌ర్‌ గా ఎంట్రీ

టాలీవుడ్‌ లో న‌ట‌వార‌సుల హ‌వా సాగుతున్న సంగ‌తి తెలిసిందే. అప్ప‌టికే ఎస్టాబ్లిస్డ్ ఫ్యామిలీ నుంచి హీరోలు ఎంట్రీ ఇస్తున్నారు. బ్యాక్‌ గ్రౌండ్ దృష్ట్యా ఈ హీరోల ఎంట్రీకి సెట‌ప్పే వేరుగా ఉంటుంది. అఖిల్‌ - బెల్లంకొండ సాయి శ్రీ‌నివాస్ లాంటి హీరోలు ఆరంగేట్ర‌మే ఓ రేంజులో అద‌ర‌గొట్టేశారు. లావిష్ ప్రొడ‌క్ష‌న్ వాల్యూస్‌ తో తీసిన సినిమాల్లో న‌టించారు ఈ ఇద్ద‌రూ. వీళ్ల త‌ర్వాత మ‌ళ్లీ ఆ రేంజు ఎంట్రీ నంద‌మూరి ఫ్యామిలీ నుంచే ఉంటుంది. నట‌సింహా బాల‌య్య త‌న‌యుడు మోక్ష‌జ్ఞ ఎంట్రీ 2017లో ఓ రేంజులో ఉంటుంద‌న్న అంచ‌నాలున్నాయి.

ఇప్పుడు టాలీవుడ్‌ లో ఓ రిచ్ ప్రొడ్యూస‌ర్ త‌న‌యుడు కూడా వెండితెర‌పైకి హీరోగా ఎంట్రీ ఇస్తున్నాడు. అయితే ఎంతో సాదాసీదాగా ఆ కుర్రాడు తెర‌కి ప‌రిచ‌యం అవుతుండ‌డం టాక్ ఆఫ్ ది టౌన్ అయ్యింది. ఇప్ప‌టికే ఆ కుర్రాడు బాల‌న‌టుడు. పేరు విక్ర‌మ్ స‌హ‌దేవ్‌. హైద‌రాబాద్ సిటీలోనే అత్యంత రిచెస్ట్ ట‌వ‌ర్స్‌ గా పేరు పొందిన ల్యాంకో హిల్స్ అధినేత, పొలిటీషియ‌న్‌ ల‌గ‌డ‌పాటి రాజ‌గోపాల్ సోద‌రుడు ల‌గ‌డ‌పాటి శ్రీ‌ధ‌ర్ (నిర్మాత‌) త‌న‌యుడు ఈ కుర్రాడు. అంత ఖ‌రీదైన ఫ్యామిలీనుంచి వ‌చ్చినా కానీ ఓ బెగ్గ‌ర్ పాత్ర‌తో సాదాసీదాగానే ఎంట్రీ ఇస్తున్నాడు.

రిచ్‌ నెస్ న‌టుడికి అక్క‌ర్లేదు. కంటెంట్‌ లో రిచ్‌ నెస్ కావాలి అని ఇలాంటి విల‌క్ష‌ణ‌మైన సినిమాని ఎంపిక చేసుకుని అంద‌రికీ ఇన్‌ స్పిరేష‌న్ అవుతున్నాడులే. త‌మిళ హిట్ చిత్రం గోళీ సోడా కి రీమేక్ చిత్ర‌మిది. ఓ న‌లుగురు వీధిబాల‌ల జీవితాల ఆధారంగా తెర‌కెక్కిన చిత్ర‌మిది. విక్ర‌మ్ వీధిబాల‌ల్లో ఒక‌నిగా న‌టిస్తున్నాడు. ఖ‌రీదైన కుర్రాడు.. బెగ్గ‌ర్‌ గా ఎంట్రీనా? మరి స్టార్ డమ్ కోసం ఏదైనా చేయాలి తప్పదు!!