ల‌క్ష్మీపార్వ‌తిని ప‌ట్టేశాడంటగా..

సీనియ‌ర్ ఎన్‌ టీఆర్‌ - ల‌క్ష్మీపార్వ‌తిల మ‌ధ్య ఉన్న‌సంబంధాన్ని ఇతివృత్తంగా చేసుకుని సంచ‌ల‌న ద‌ర్శ‌కుడు రామ్‌ గోపాల్‌ వ‌ర్మ ‘ల‌క్ష్మీస్ ఎన్‌ టీఆర్‌’ అనే సినిమా చేయ‌బోతున్న‌ట్టు ప్ర‌క‌టించాడు. ఆ త‌ర్వాత సీనియ‌ర్ ఎన్‌ టీఆర్‌ - చంద్ర‌బాబునాయుడు - ల‌క్ష్మీపార్వతి ఉన్న కొన్ని పాత ఫోటోల‌ను పోస్టు చేస్తూ - త‌న సినిమా గురించి అంద‌రూ మాట్లాడుకునేలా చేశాడు. ఇప్పుడు ఆ సినిమాను మ‌ళ్లీ చ‌ర్చ‌ల్లోకి తీసుకొచ్చాడు ఆర్‌ జీవీ.

వ‌రుస పోస్టు ల‌తో ‘ల‌క్ష్మీస్ ఎన్‌ టీఆర్‌’ సినిమా గురించి హ‌డావిడి చేసిన త‌ర్వాత వెంట‌నే నాగార్జున‌తో ‘ఆఫీస‌ర్‌’ సినిమా ప్రారంభించ‌డంతో, పోస్ట‌ర్ల‌కే ప‌రిమిత‌మైన ఎన్నో వ‌ర్మ సినిమాల్లాగా ఇది కూడా పోస్ట‌ర్ల వ‌ర‌కే ప‌రిమిత‌మవుతుంద‌ని అనుకున్నారంతా. కానీ ఈ సినిమాను క‌చ్చితంగా తీయాల‌నే ప‌ట్టుద‌ల‌తో ఉన్న‌ట్టు క‌నిపిస్తున్నాడు వ‌ర్మ‌. ఇందులో కీల‌క‌మైన ల‌క్ష్మీపార్వ‌తి పాత్ర కోసం హీరోయిన్‌ను క‌న్ఫార్మ్ చేసేశాడు ఆర్జీవీ. నాగార్జున‌తో ‘ఆఫీస‌ర్‌’ సినిమాలో హీరోయిన్‌ గా చేస్తున్న మైరా స‌రీన్‌ - ల‌క్ష్మీస్ ఎన్‌ టీఆర్ చిత్రంలో ల‌క్ష్మీగా న‌టించ‌బోతోంది. ఆఫీస‌ర్ సినిమాలో ఆమె న‌ట‌న‌కూ ముగ్దుడైన వ‌ర్మ‌ - ల‌క్ష్మీపార్వ‌తిగా మైరా అయితేనే స‌రిగ్గా స‌రిపోతుంద‌ని ఫిక్స్ అయ్యాడ‌ట‌.

మైరా స‌రీన్ న‌ట‌న‌కు నేనూ - నాగార్జునా ఆశ్చ‌ర్య‌పోయామంటూ ఆ మ‌ధ్య సోష‌ల్ మీడియాలో పోస్టు చేశాడు వ‌ర్మ‌. ఇప్పుడు ఏకంగా త‌ర్వాతి సినిమాలో కీల‌క పాత్ర‌కు ఎంపిక చేశాడు. వ‌ర్మ‌కు ఈ అమ్మ‌డిలో అంత‌గా ఏం క‌నిపించిందో తెలియాలంటే మాత్రం ‘ఆఫీస‌ర్‌’ సినిమా విడుద‌ల‌య్యేదాకా ఎదురుచూడాల్సిందే. ‘ఆఫీస‌ర్’ మే 25న విడుద‌ల కాబోతోంది.