'లాలా భీమ్లా' ప్రోమో: భీమ్లా నాయక్‌ సౌండింగ్ మామూలుగా లేదుగా..!

పవన్ కళ్యాణ్ - దగ్గుబాటి రానా హీరోలుగా తెరకెక్కుతున్న తాజా చిత్రం ''భీమ్లా నాయక్‌''. ఇది మలయాళంలో విజయవంతమైన 'అయ్యప్పనుమ్‌ కోషియమ్‌' చిత్రానికి అధికారిక రీమేక్‌. ఇందులో పవర్ ఫుల్ పోలీసాఫీసర్ గా పవన్.. అతనికి ధీటుగా నిలిచే డేనియల్ శేఖర్ పాత్రలో రానా కనిపించనున్నారు. 2022 సంక్రాంతి సందర్భంగా జనవరి 12న ఈ సినిమా ప్రేక్షకుల ముందుకు రానుంది.

పవన్ కళ్యాణ్ పాత్రకు సంబంధించి ఇప్పటికే విడుదలైన గ్లిమ్స్‌ లో 'లాలా భీమ్లా' అనే బ్యాక్‌ గ్రౌండ్‌ స్కోర్‌ అభిమానులను విశేషంగా అలరించింది. 'లాలా.. భీమ్లా.. అడవి పులి.. గొడవపడే.. ఒడిసిపట్టు.. దంచికొట్టు' అంటూ ఫ్యాన్స్ కి పూనకలు తెప్పించింది. సినిమాలో ఈ థీమ్‌ సాంగ్‌ ఎలా ఉండబోతుందో అనే ఆసక్తిని పెంచింది. ఈ నేపథ్యంలో దీపావళి కానుకగా తాజాగా 'ది సౌండ్‌ ఆఫ్‌ భీమ్లా' వీడియో ప్రోమోని మేకర్స్ రిలీజ్ చేశారు.

'భీమ్లా నాయక్‌' సినిమాలో పవన్ కళ్యాణ్ క్యారెక్టరజేషన్ - యాటిట్యూడ్ ఎలా ఉండబోతోందో 'లాలా భీమ్లా' ప్రోమో తెలియజేస్తోంది. ఇదొక ఫైట్ సీన్ కి సంబంధించినది కాగా.. బస్తాలను తొలగించుకుంటూ పవన్ కోపంగా బయటకు వస్తున్నట్లు చూపించారు. 'నాగరాజు గారు.. హార్ట్లీ కంగ్రాచ్యులేషన్ అండి.. మీకు దీపావళి పండుగ ముందుగానే వచ్చేసిందండి.. హ్యాపీ దీపావళి' అంటూ రానా కారుని పవన్ నాటు బాంబ్ తో పేల్చేయడం ఈ ప్రోమోలో కనిపించింది.

'లాలా భీమ్లా' సాంగ్ కు ఎస్ఎస్ థమన్ అందించిన ట్యూన్ పవన్ ఫ్యాన్స్ ని ఊర్రూతలూగిస్తోంది. నవంబర్ 7న పూర్తి పాటను రిలీజ్ చేయనున్నట్లు చిత్ర బృందం ప్రకటించింది. మొత్తం మీద దీపావళి కానుకగా వచ్చిన ఈ సర్‌ప్రైజ్‌ అభిమానులను ఖుషీ చేస్తోందని చెప్పాలి.

కాగా, 'భీమ్లా నాయక్‌' చిత్రానికి సాగర్ కె చంద్ర దర్శకత్వం వహిస్తుండగా.. త్రివిక్రమ్ శ్రీనివాస్ స్క్రీన్ ప్లే - మాటలు అందిస్తున్నారు. సితార ఎంటర్టైన్మెంట్స్ బ్యానర్ పై సూర్యదేవర నాగవంశీ ప్రతిష్టాత్మకంగా ఈ చిత్రాన్ని నిర్మిస్తున్నారు. ఇందులో పవన్‌ కళ్యాణ్ కు జోడీగా నిత్యా మీనన్‌.. రానా కు జోడీగా సంయుక్త మీనన్ సందడి చేయనున్నారు. రవి కె చంద్రన్ ఈ సినిమాకు సినిమాటోగ్రఫీ అందిస్తుండగా.. ఏఎస్ ప్రకాష్ ఆర్ట్ డైరెక్టర్ గా వర్క్ చేస్తున్నారు. నవీన్ నూలి ఎడిటింగ్ బాధ్యతలు నిర్వహిస్తున్నారు.