పిక్ టాక్: డెవిల్ మోడ్‌ లో నందమూరి హీరో..!

నందమూరి కళ్యాణ్ రామ్ ఇటీవల ''బింబిసార'' సినిమాతో భారీ బ్లాక్ బస్టర్ అందుకున్నారు. తన కెరీర్ లో 'అతనొక్కడే' 'పటాస్' '118' వంటి విజయాలు అందుకున్న హీరో.. సరైన సక్సెస్ కోసం చాలా కాలంగా ఎదురు చూస్తున్నారు. ఈ నేపథ్యంలో సోసియో ఫాంటసీ యాక్షన్ మూవీతో సాలిడ్ హిట్ కొట్టాడు.

టైం ట్రావెల్ కాన్సెప్ట్ తో తెరకెక్కిన 'బింబిసార' సినిమా ప్రేక్షకులకు సరికొత్త అనుభూతిని పంచింది. ఇందులో త్రిగర్తల చక్రవర్తి బింబిసారుడిగా కళ్యాణ్ రామ్ అద్భుతమైన నటన కనబరిచారు. ఈ మూవీ ఇచ్చిన సక్సెస్ జోష్ లో నందమూరి హీరో ఇప్పుడు రెట్టింపు ఉత్సాహంతో పని చేస్తున్నాడు.

కళ్యాణ్ రామ్ జిమ్‌ లో హార్డ్ వర్కౌట్స్ చేస్తున్నాడు. దీనికి సంబంధించిన ఫోటో ఒకటి సోషల్ మీడియాలో వైరల్ అవుతోంది. ఇందులో నందమూరి హీరో ఎంతో ఫిట్ గా.. పర్ఫెక్ట్ యాబ్స్ తో డెవిల్ మోడ్‌ లో కనిపిస్తున్నాడు. మరోసారి బార్బేరియన్ కింగ్ మాదిరిగా క్రూరంగా చూస్తూ మరోసారి బింబిసారని గుర్తు చేస్తున్నాడు.

'బింబిసార' వంటి అద్భుతమైన విజయాన్ని అందించినందుకు కళ్యాణ్ రామ్ మరోసారి ప్రేక్షకులకు కృతజ్ఞతలు తెలుపుతున్నారు. అతి త్వరలో ''అమిగోస్'' మ్యాజిక్ చూపించడానికి తాను ఆసక్తిగా వేచి చూస్తున్నానని పేర్కొన్నాడు.

కళ్యాణ్ రామ్ కథానాయకుడిగా మైత్రీ మూవీ మేకర్స్ బ్యానర్ లో రూపొందుతున్న తాజా చిత్రం ''అమిగోస్''. ఇది అతనికి 19వ చిత్రం. నూతన దర్శకుడు రాజేందర్ రెడ్డి తెరకెక్కిస్తున్నాడు. జిబ్రాన్ సంగీతం సమకూరుస్తున్నాడు. 2023 ఫిబ్రవరిలో ఈ చిత్రాన్ని విడుదల చేయనున్నట్లు మేకర్స్ ఇటీవలే అధికారికంగా ప్రకటించారు. త్వరలోనే ఈ సినిమాకు సంబంధించిన ఇతర వివరాలు వెల్లడిస్తారు.

ఇకపోతే కళ్యాణ్ రామ్ లైనప్ లో 'డెవిల్' అనే పాన్-ఇండియన్ సినిమా కూడా ఉంది. 1945 బ్రిటీష్ ఇండియాలోని మద్రాస్ ప్రెసిడెన్సీ నేపథ్యంలో ఒక చీకటి రహస్యాన్ని ఛేదించే బ్రిటిష్ సీక్రెట్ ఏజెంట్ కథతో ఈ చిత్రం తెరకెక్కుతోంది. నవీన్ మేడారం దర్శకత్వం వహిస్తున్న ఈ మూవీని అభిషేక్ పిక్చర్స్ సంస్థ భారీ బడ్జెట్ తో నిర్మిస్తోంది.

అలానే దిల్ రాజు ప్రొడక్షన్ లో కేవీ గుహన్‌ దర్శకత్వంలో కళ్యాణ్ రామ్ ఓ ఆసక్తికరమైన ప్రాజెక్ట్‌ లో నటిస్తున్నాడు. ఇదే క్రమంలో మల్లిడి వశిష్ట దర్శకత్వంలో 'బింబిసార 2' సినిమాని సెట్స్ మీదకు తీసుకొచ్చే అవకాశం ఉంది. ఎన్టీఆర్ ఆర్ట్స్ బ్యానర్ పై ఈ సినిమా రూపొందనుంది. 'బింబిసార' తో సక్సెస్ ట్రాక్ ఎక్కిన నందమూరి హీరో.. రాబోయే చిత్రాలతో దాన్ని కొనసాగిస్తారేమో చూడాలి.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.