చిరంజీవి పాత సినిమా టైటిల్ తో సరికొత్త చిత్రం..!

మెగాస్టార్ చిరంజీవి కెరీర్ లో క్లాసిక్ మూవీ ''రుద్రవీణ''. 1988లో దిగ్గజ దర్శకుడు కె. బాలచందర్ ఈ చిత్రాన్ని తెరకెక్కించారు. మెగా బ్రదర్ నాగబాబు ఈ సినిమాతోనే అంజనా ప్రొడక్షన్స్ స్థాపించి నిర్మాణంలోకి దిగారు. చిరు ఇమేజ్ కి పూర్తి భిన్నంగా సోషల్ మెసేజ్ తో రూపొందించిన ఈ సినిమా విమర్శకుల ప్రశంసలు అందుకుంది. జాతీయ సమగ్రతలో ఉత్తమ ఫీచర్ ఫిల్మ్ గా నర్గీస్ దత్ అవార్డు వంటి ఎన్నో అవార్డులు రివార్డులు సాధించింది.

సనాతన బ్రాహ్మణ కుటుంబంలో పుట్టిన యువకుడు తన తండ్రిని ఎదిరించి.. బడుగు బలహీన వర్గాల కోసం మరియు సమాజం కోసం ఎలా పాటుపడ్డాడనేదే 'రుద్రవీణ' కథ. అయితే అప్పటికే కమర్షియల్ సినిమాలతో మాస్ హీరోగా ఎదిగిన చిరంజీవి ఇమేజ్ కి ఈ మూవీ అసలు సెట్ కాలేదు. అందుకే ఆశించిన స్థాయిలో కమర్షియల్ సక్సెస్ కాలేదు.

ఇప్పుడు ఇదంతా ఎందుకు గుర్తు చేసుకోవాల్సి వచ్చిందంటే.. ''రుద్రవీణ'' అనే టైటిల్ తో తెలుగులో ఓ సినిమా తెరకెక్కుతోంది. ఇంతకు ముందెన్నడూ చూడని ప్రతీకార కథ అంటూ తాజాగా ఈ సినిమా ప్రీ లుక్ తో పాటుగా ఆసక్తికరమైన టైటిల్ పోస్టర్ ను మేకర్స్ ఆవిష్కరించారు.

'రుద్రవీణ' ప్రీ లుక్ పోస్టర్ లో ఓ వ్యక్తి పదునైన కత్తిని ఒక మహిళకు అందిస్తున్నాడు. ఇది చూస్తుంటే చిరంజీవి సినిమాకు పూర్తి భిన్నమైన జోనర్ లో ఈ సినిమా తెరకెక్కుతుందని అర్థం అవుతోంది. మధుసూధన్ రెడ్డి దర్శకత్వం వహిస్తున్న ఈ చిత్రాన్ని రేగుల లక్ష్మణ్ రావు నిర్మిస్తున్నారు.

శ్రీరామ్ నిమ్మల - ఎల్సా ఘోష్ - శుభశ్రీ రాయగురు వంటి నూతన నటీనటులతో రూపొందే 'రుద్రవీణ' సినిమాలో సింగర్ కమ్ యాక్టర్ రఘు కుంచె కీలక పాత్ర పోషిస్తున్నారు. త్వరలోనే ఈ చిత్రాన్ని ప్రేక్షకుల ముందుకు తీసుకొస్తామని నిర్మాతలు అంటున్నారు.

ఇకపోతే చిరంజీవి పాత సినిమాల టైటిల్స్ తో తెలుగులో ఇప్పటి వరకు 20కి పైగా చిత్రాలు వచ్చాయి. అయితే ఆ మెగా టైటిల్స్ ఇప్పటి హీరోలకు పెద్దగా కలిసిరాలేదనే చెప్పాలి. ఎందుకంటే వాటిల్లో ఎక్కువ శాతం నిరాశ పరిచిన సినిమాలే ఉన్నాయి. మరి ఇప్పుడు చిరంజీవి ఓల్డ్ సినిమా టైటిల్ 'రుద్రవీణ' ఎలాంటి విజయాన్ని అందిస్తుందో చూడాలి.