ఆయనలోని ఆ తపనే నాకు నచ్చుతుంది: జాక్వెలిన్

బాలీవుడ్ బ్యూటీలలో జాక్వెలిన్ కి ప్రత్యేకమైన స్థానం ఉంది. మిగతా కథానాయికలకు భిన్నంగా ఆమె బాడీ లాంగ్వే జ్ ఉంటుంది. తన బాడీ లాంగ్వేజ్ కి తగిన పాత్రలను మాత్రమే ఆమె అంగీకరిస్తూ ఉంటుంది. ఈ శ్రీలంక బ్యూటీ జాన్ అబ్రహంతో కలిసి తెరపై బాగానే సందడి చేసింది. గతంలో 'రేస్ 2' .. ' డిష్యుమ్' వంటి సినిమాలలో అలరించిన ఈ జంట, ఇప్పుడు 'ఎటాక్ పార్టు 1'తో ప్రేక్ షాకుల ముందుకు రావడానికి రెడీ అవుతున్నారు. లక్ష్య రాజ్ ఆనంద్ ఈ సినిమాకి దర్శకత్వం వహించాడు.

'ఏక్ థా టైగర్' .. 'బ్యాంగ్ బ్యాంగ్' వంటి సినిమాలకు అసిస్టెంట్ డైరెక్టర్ గా .. 'రాకెట్ సింగ్' సినిమాకి దర్శకత్వం వహించిన లక్ష్యరాజ్ ఆనంద్ ఈ సినిమాకి దర్శకత్వం వహించాడు. యాక్షన్ .. యాక్షన్ కామెడీ సినిమాలకు కేరాఫ్ అడ్రెస్ గా చెప్పుకునే జాన్ అబ్రహం, ఈ సినిమాలోను తనదైన మార్క్ చూపించే పాత్రలో కనిపించనున్నాడు. జయంతిలాల్ గడ - అజయ్ కపూర్ నిర్మించిన ఈ సినిమాకి, జాన్ అబ్రహం కూడా ఒక నిర్మాతగా వ్యవహరించాడు. ప్రకాశ్ రాజ్ .. రకుల్ ప్రీత్ సింగ్ ముఖ్యమైన పాత్రలను పోషించిన ఈ సినిమాను ఏప్రిల్ 1వ తేదీన విడుదల చేయనున్నారు.

ఈ నేపథ్యంలో ఈ సినిమా ప్రమోషన్స్ జోరందుకున్నాయి. బాలీవుడ్ లో ఇప్పుడు ఎక్కడ చూసినా ఈ సినిమా టీమ్ కనిపిస్తోంది. తాజా ఇంటర్వ్యూలో జాక్వెలిన్ మాట్లాడుతూ .. "ఈ కథ చాలా కొత్తగా ఉంటుంది. సైన్స్ ఫిక్షన్ తో ముడిపడిన ఒక సూపర్ సోల్జర్ సినిమా ఇది. ఈ కథ చాలా ఇంట్రెస్టింగ్ గా ఉంటుంది. ఇలాంటి ఒక సినిమాలో అవకాశం రావడం నా అదృష్టంగా భావిస్తున్నాను. జాన్ అబ్రహంతో కలిసి నటించడం ఎంతో సంతోషంగా .. సరదాగా ఉంటుంది.

తన ప్రతి సినిమా విషయంలో ఆయన ఎంతగా కష్టపడతారనేది ప్రత్యేకించి చెప్పనవసరం లేదు. అలాగే ఈ సినిమా విషయంలోను ఆయన ఎంతగా కష్టపడ్డాడనేది నేను ప్రత్యక్షంగా చూశాను. తన పాత్రకి న్యాయం చేయడం కోసం ఆయన పడే తపన నాకు ఎంతో నచ్చుతుంది. ఈ సినిమా తప్పకుండా హిట్ అవుతుందనే నమ్మకం నాకు ఉంది" అంటూ చెప్పుకొచ్చింది. ఇక కొంతకాలంగా బాలీవుడ్ లో నిలదొక్కుకోవడానికి రకుల్ గట్టిగానే ప్రయత్నాలు చేస్తోంది. ఈ సినిమా హిట్ ఆమెకి మరింత అవసరం. అందువలన ఆమె కూడా ఈ సినిమా రిలీజ్ కోసం వేయి కళ్లతో వెయిట్ చేస్తోంది.