అమ్మడిని ప్లాపుల నుంచి గట్టెక్కిస్తాడా..?

సౌత్ స్టార్ హీరోయిన్లలో ఒకరైన మహానటి కీర్తి సురేష్ వరుస సినిమాలతో బిజీగా వుంది. అయితే గత కొంతకాలంగా ఆమె నటిస్తున్న సినిమాలు బాక్సాఫీస్ వద్ద బోల్తా కొడుతుండటం అభిమానులను కలవరపెడుతోంది.

కీర్తి సురేష్ నటించిన 'రంగ్ దే' 'అన్నాత్తే' 'మరక్కర్: అరేబియన్ సింహం' వంటి సినిమాలు గతేడాది ప్లాప్స్ గా నిలిచాయి. ఓటీటీలో వచ్చిన 'మిస్ ఇండియా' మూవీ కూడా ప్రేక్షకులను అలరించలేకపోయింది.

ఈ ఏడాది కూడా 'గుడ్ లక్ సఖి' వంటి పరాజయంతో కీర్తికి స్వాగతం పలికింది. దీంతో ఇప్పుడు ఆమె హీరోయిన్ గా నటిస్తున్న అందరి దృష్టి 'సర్కారు వారి పాట' సినిమాపై పడింది.

సూపర్ స్టార్ మహేష్ బాబు హీరోగా పరశురాం పెట్లా దర్శకత్వంలో తెరకెక్కుతున్న యాక్షన్ ఎంటర్టైనర్ 'సర్కారు వారి పాట.' తొలిసారి మహేష్ - కీర్తి సురేష్ కలిసి స్క్రీన్ షేర్ చేసుకుంటున్నారు.

SVP టీజర్ లో మహేష్ - కీర్తి మంచి జోడీగా కనిపించారు. ఇటీవల విడుదలైన 'కళావతి' పాటలో వీరిద్దరి మధ్య మ్యాజికల్ కెమిస్ట్రీ వర్కవుట్ అయినట్లు కనిపించింది. తెరపై ఫ్రెష్ జోడీని చూడబోతున్నామనే ఉత్సుకత కలిగించారు.

అయితే ఇటీవల కాలంలో కీర్తి సురేష్ వరుస పరాజయాలు అందుకోవడంతో మహేష్ ఫ్యాన్స్ కాస్త కలవరపడుతున్నారు. హ్యాట్రిక్ బ్లాక్ బస్టర్స్ తో దూకుడు మీదున్న మహేష్ స్పీడ్ కు బ్రేకులు వేస్తుందేమో అని భయపడుతున్నారు.

మరో వర్గం అభిమానులు మహేష్ బాబు 'సర్కారు వారి..' తో మహానటిని ప్లాపుల నుంచి బయట పడేస్తారని అంటున్నారు. కీర్తి సురేష్ ఫ్యాన్స్ మాత్రం ఈ సినిమా సక్సెస్ లో ఆమె కీలక పాత్ర పోషిస్తుందని నమ్ముతున్నారు. మరి ఏం జరుగుతుందో చూడాలి.

ఇకపోతే కీర్తి ప్రస్తుతం 'భోళా శంకర్' చిత్రంలో మెగాస్టార్ చిరంజీవి సోదరిగా నటిస్తోంది. అలానే నాని సరసన 'దసరా' అనే సినిమాలో హీరోయిన్ గా చేస్తోంది. ఇదే క్రమంలో హోమ్ బ్యానర్ లో 'వాసి' అనే మలయాళ సినిమా సెట్స్ మీద ఉంది. అమ్మడి లైనప్ లో రెండు తమిళ చిత్రాలు కూడా ఉన్నాయి.