'ఆడవాళ్లు మీకు జోహార్లు' నాన్ స్టాప్ గా నవ్వించడం ఖాయం!

శర్వానంద్ కథానాయకుడిగా దర్శకుడు కిశోర్ తిరుమల 'ఆడవాళ్లు మీకు జోహార్లు' సినిమాను రూపొందించాడు. కిశోర్ తిరుమల ఎప్పుడూ కూడా ప్రేమను ప్రధానంగా చేసుకుని, దానిని ఫ్యామిలీ ఎమోషన్స్ చుట్టూ తిప్పుతుంటాడు. కానీ ఈ సారి అందుకు భిన్నంగా ఆయన 'ఆడవాళ్లు మీకు జోహార్లు' సినిమాతో ఫ్యామిలీ ఎంటర్టైనర్ ను ఎంచుకుని అందులో లవ్ ను మిక్స్ చేసి నడిపించాడు. సుధాకర్ చెరుకూరి నిర్మించిన ఈ సినిమాలో, శర్వానంద్ జోడీగా రష్మిక అలరించనుంది. ఇతర ముఖ్యమైన పాత్రల్లో రాధిక .. ఖుష్బూ .. ఊర్వశి కనిపించనున్నారు.

ఈ నెల 25వ తేదీన ఈ సినిమాను భారీస్థాయిలో విడుదల చేయనున్నారు. ఈ నేపథ్యంలో కొంతసేపటి క్రితం ఈ సినిమా టీమ్ ప్రీ రిలీజ్ ప్రెస్ మీట్ ను ఏర్పాటు చేసింది. ఈ వేదికపై కిశోర్ తిరుమల మాట్లాడుతూ .. 'ఆడవాళ్లు మీకు జోహార్లు' సినిమా ఇంత బాగా రావడానికి కారకులైన ఈ సినిమాలోని ఆడవాళ్లందరికీ ముందుగా థ్యాంక్స్ చెబుతున్నాను. వాళ్లందరి సహకారం వల్లనే ఈ సినిమా నేను అనుకున్నట్టుగా వచ్చింది. ఒకవేళ ఎక్కడైనా రాజీ పడదామని నేను అనుకున్నప్పటికీ, శర్వానంద్ ఒప్పుకునేవారు కాదు. ముందుగా ఎలా అయితే అనుకున్నామో అలాగే చేద్దామని అనేవారు.

రష్మిక విషయానికి వస్తే ఆమె చాలా బిజీ. అయినా మేము ఎప్పుడు షూటింగు పెట్టుకుంటే అప్పుడు వచ్చి కోపరేట్ చేశారు .. అందుకు ఆమెకి థ్యాంక్స్ చెబుతున్నాను. ఇక ఈ సినిమాలో పాత్రలను రాస్తున్నప్పుడే రాధిక .. ఖుష్బూ గార్లను తప్ప మరొకరిని అనుకోలేకపోయాను.

వాళ్లు చేయడం వల్లనే ప్రతి సీన్ నెక్స్ట్ లెవెల్ కి వెళ్లింది. కరోనా సమయంలో ఎవరి ఇంటికి వాళ్లు పరిమితమైపోయారు. థియేటర్లకు వెళ్లడానికి భయపడ్డారు. అలాంటి వాళ్లంతా ఈ సినిమా చూస్తూ హాయిగా నవ్వుకోవాలనే ఉద్దేశంతోనే ఈ స్క్రిప్ట్ పై కసరత్తు చేశాను.

ఈ సినిమాను చూస్తూ మీరంతా హ్యాపీగా ఎంజాయ్ చేస్తారని నేను కచ్చితంగా చెప్పగలను. టైటిల్ కి తగినట్టుగానే ఈ సినిమాలో ఎక్కడ చూసినా ఉమెన్ ప్రెజెన్స్ కనిపిస్తుంది. ఇప్పటికే మాస్ .. యూత్ ఆడియన్స్ థియేటర్లకు వస్తున్నారు. ఫ్యామిలీ ఆడియన్స్ పూర్తిస్థాయిలో బయటికి వస్తే ఈ సినిమాను తప్పకుండా ఎంజాయ్ చేస్తారు. దేవిశ్రీ ప్రసాద్ తో ఇది నాకు నాలుగో సినిమా.

ప్రతి పాట కూడా కథలో నుంచి వచ్చేలా కుదిరింది. ఇంతవరకూ ఈ సినిమా నుంచి వదిలిన సాంగ్స్ కి చాలా మంచి రెస్పాన్స్ వచ్చింది. ఈ సినిమా మీ అందరికీ తప్పకుండా నచ్చుతుందనే నమ్మకం నాకు ఉంది" అని చెప్పుకొచ్చాడు.