హరీశ్ శంకర్ ట్వీట్ వెనుక ఆంతర్యమేంటి..?

పవర్ స్టార్ పవన్ కళ్యాణ్ తో డైనమిక్ డైరెక్టర్ హరీష్ శంకర్ మరో బ్లాక్ బస్టర్ ను సిద్ధం చేసేందుకు సమాయత్తం అవుతున్నారనే సంగతి తెలిసిందే. 'గబ్బర్ సింగ్' చిత్రంతో పవన్ కు బిగ్గెస్ట్ హిట్ అందించిన హరీష్.. ఆయనతో ''భవదీయుడు భగత్ సింగ్'' అనే ఆసక్తికరమైన ప్రాజెక్ట్ ను అనౌన్స్ చేశారు. అయితే ఈ ప్రాజెక్ట్ కు సంబంధించిన రెగ్యులర్ షూటింగ్ ఇంకా స్టార్ట్ కాలేదు.

పవన్ కళ్యాణ్ నటించిన లేటెస్ట్ మూవీ ‘భీమ్లా నాయక్’ సక్సెస్ అవడంతో ఇప్పుడు అభిమానుల దృష్టి హరీష్ శంకర్ పై పడింది. వీలైనంత త్వరగా ఈ సినిమాని ప్రారంభించాలని కోరుతున్నారు. దర్శకుడు మాత్రం సినిమాలో టైమింగ్ ఎంత ముఖ్యమో.. సినిమాకు టైమింగ్ అంతే ముఖ్యమని నమ్ముతానంటూ వారికి నచ్చజెప్తూ వస్తున్నారు.

అయితే తాజాగా హరీశ్ శంకర్ ట్విట్టర్ లో షేర్ చేసిన ఓ కోట్ ఇప్పుడు హాట్ టాపిక్ గా మారింది. 'స్లో అండ్ స్టడీ.. విన్స్ నథింగ్' అనే కొటేషన్ పెట్టిన డైరెక్టర్.. 'అవును.. కొన్నిసార్లు' అని పేర్కొన్నారు. హరీష్ ఈ లైన్స్ ను ఎందుకు పోస్ట్ చేయాల్సి వచ్చిందని అందరూ ఆలోచిస్తున్నారు.

నిజానికి హరీష్ కెరీర్ ప్రారంభం నుంచీ స్లో అండ్‌ స్టడీ సూత్రాన్నీ ఫాలో అవుతూ వస్తున్నారు. సినిమా సినిమాకు మధ్య కచ్చితంగా గ్యాప్ ఉంటుంది. కానీ ఇప్పుడు నెమ్మదిగా నిలకడగా ఉండటం రేసులో గెలవదు అంటూ పోస్ట్ చేయడం చర్చనీయాంశంగా మారింది.

మన హీరో షూటింగ్ షెడ్యూల్ మరోసారి పోస్ట్ పోన్ చేశాడా అని పవన్ ఫ్యాన్స్ కామెంట్స్ చేస్తున్నారు. ఈ క్రమంలో పవన్ కళ్యాణ్ తో దర్శకుడు చేయాల్సిన ప్రాజెక్ట్ ఆగిపోయిందా అనే సందేహాలు వ్యక్తం చేస్తున్నారు. ఇదే నిజమైతే హరీష్ తదుపరి ఛాయిస్ ఎవరు అనే చర్చ నట్టింట మొదలైంది.

పవన్ తో సినిమా కోసం హరీష్ చాలా కాలంగా వేచి చూస్తున్నారు. మరో ప్రాజెక్ట్ మీదకు దృష్టి మళ్లించకుండా దీని మీదనే కూర్చున్నారు. ‘భవదీయుడు భగత్ సింగ్’ సినిమా గురించి ఇటీవల ఒక ఇంటర్వ్యూలో మాట్లాడుతూ.. జూన్ నెలాఖరులో ఈ మూవీ షూటింగ్ ప్రారంభమయ్యే అవకాశాలు ఉన్నాయని వెల్లడించారు.

ఇందులో పవన్ కళ్యాణ్ సరసన పూజా హెగ్డేనే హీరోయిన్ అని ధృవీకరించిన హరీష్ శంకర్.. ఓ కీలక పాత్రకు ‘మీర్జాపూర్’ ఫేమ్ పంకజ్ త్రిపాఠిని తీసుకుంటున్నట్లు తెలిపారు. అలానే కమెడియన్ సత్య ఈ సినిమాలో నటిస్తారని చెప్పారు. ఏదేమైనా 'గబ్బర్ సింగ్' తరువాత పవన్ - హరీష్ కాంబోలో వస్తున్న చిత్రం కావడంతో అభిమానులు 'భవదీయుడు..' కోసం ఆతృతగా ఎదురుచూస్తున్నారు.

హరీష్ అయితే ఫ్యాన్స్ కోరుకునే అన్ని అంశాలతో కూడిన పక్కా కమర్షియల్ ఎంటర్టైనర్ ఇస్తారని భావిస్తున్నారు. మైత్రీ మూవీ మేకర్స్ బ్యానర్ పై నవీన్ ఎర్నేని - వై. రవిశంకర్ ఈ చిత్రాన్ని నిర్మించనున్నారు. రాక్ స్టార్ దేవిశ్రీ ప్రసాద్ సంగీతం సమకూరుస్తున్నారు. అయానంక బోస్ సినిమాటోగ్రాఫర్ గా.. ఆనంద్ సాయి ఆర్ట్ డైరెక్టర్ గా వర్క్ చేయనున్నారు. రామ్-లక్ష్మణ్ యాక్షన్ కొరియోగ్రఫీ మరియు చోటా కె ప్రసాద్ ఎడిటింగ్ బాధ్యతలు నిర్వహిస్తారు.