కాన్ఫిడెన్సా? ఓవ‌ర్ కాన్ఫిడెన్సా?

'కేజీఎఫ్' చిత్రం పాన్ ఇండియాలో ఎలాంటి స‌క్సెస్ సాధించిందో చెప్పాల్సిన ప‌నిలేదు. ఒక్క హిట్ తో అందులో న‌టించిన య‌శ్..ఆ సినిమాకి ద‌ర్శ‌క‌త్వం వ‌హించిన ప్ర‌శాంత్ నీల్ దేశ వ్యాప్తంగా ఫేమ‌స్ అయ్యారు. క‌మ‌ర్శియ‌ల్ యాక్ష‌న్ స్టార్ గా య‌శ్ ఓ రేంజ్ ఫేమ‌స్ అయ్యాడు. ఇక ప్ర‌శాంత్ నీల్ మేకింగ్ లో త‌న‌దైన మార్క్ వేసారు. తెర‌పై య‌శ్ ని ఆవిష్క‌రించిన విధానం..ఆ పాత్ర డిజైనింగ్..ప‌వ‌ర్ ఫుల్ పాత్ర‌ల సృష్టి వెనుక ప్ర‌శాంత్ ఐడియాల‌జీ యూనిక్ గా అనిపించింది. అత‌నిలో అసాధార‌ణ‌మైన ఆ ప్ర‌తిభ‌నే అంత‌టి వాడిని చేసింది. ఇప్పుడీ కాంబినేష‌న్ లో 'కేజీఎఫ్ -2' తెర‌కెక్కిన సంగ‌తి తెలిసిందే.

పాండ‌మిక్ కార‌ణంగా వాయిదా ప‌డిన సినిమా ఎట్ట‌కేల‌కు ఏప్రిల్ 14న రిలీజ్ అవుతుంది. సినిమాపై ఇప్ప‌టికే భారీ అంచ‌నాలున్నాయి. రిలీజ్ అయిన ప్ర‌చార చిత్రాలు మంచి హైప్ ని తీసుకొచ్చాయి. అయితే ఇవ‌న్ని సినిమా సెట్ లో ఉన్న‌ప్పుడే జ‌రిగింది. అప్పుడు క్రియేట్ అయిన బ‌జ్ అంతా ఇది. సినిమా షూటింగ్ స‌హా అన్ని ప‌నులు పూర్తిచేసి రిలీజ్ కి రెడీగా ఉంది. ఏప్రిల్ 14 అంటే స‌మ‌యం స‌మీపిస్తోంది. ఈ నేప‌థ్యంలో యూనిట్ సినిమాకి కావాల్సిన ప్ర‌చారం తీసుకురావ‌డం లేద‌ని సోష‌ల్ మీడియాలో నెటి జ‌నులు..అభిమానులు కామెంట్లు చేస్తున్నారు.

ఈ విష‌యంలో మేక‌ర్స్ వెనుక‌బాటుత‌నం..అల‌స‌త్వం కనిపిస్తుంద‌ని అభిప్రాయ‌ప‌డుతున్నారు. ప్ర‌చారం విష‌యంలో పూర్తి అసంతృప్తిని వ్య‌క్తం చేసారు. ఇంత పెద్ద సినిమా విష‌యంలో నెగ్ల‌జెన్సీ ఏంటి? అన్న కోణాన్ని సైతం తెర‌పైకి తీసుకొచ్చారు. దీంతో ప్ర‌శాంత్ నీల్ సినిమాని ఉద్దేశించి సంచ‌ల‌న వ్యాఖ్య‌లు చేసారు. ఆ వ్యాఖ్య‌ల‌తో ఫ్యాన్స్ ని మ‌రింత నిరాశ‌కు గురి చేసారు ప్ర‌శాంత్ నీల్. ఇంత‌కీ స్టార్ మేక‌ర్ సినిమాని ఏవిధంగా ఉద్దేశించిన‌ట్లు? అంటే..

"య‌శ్ పెద్ద స్టార్. ట్రైల‌ర్ తో పాటు ఒక్క విజువ‌ల్ కూడా ముందుగా చూపించాల్సిన ప‌నిలేదు. ట్రైల‌ర్ ని పూర్తిచేసి నేరుగా సినిమాని ఏప్రిల్ 14న థియేట‌ర్లో విడుద‌ల చేస్తాం" అన్నారు. దీంతో సోష‌ల్ జ‌నం మరింత చెల‌రేగుతున్నారు. కాన్ఫిడెన్సా? ఓవ‌ర్ కాన్ఫిడెన్సా? అంటూ కామెంట్ చేస్తున్నారు. య‌శ్ పెద్ద స్టార్ అయింది 'కేజీఎఫ్' తో.

అంత‌కు ముందు అత‌నెవ‌రో ఎవ‌రికీ తెలియ‌దు. ఒక్క హిట్ తోనే అంత పెద్ద స్టార్ అయితే ఓ ప్లాప్ తో ఏ స్థాయికి ప‌డిపోతారో తెలియ‌దా? అంటూ మండిప‌డుతున్నారు. సినిమాపై అంచ‌నాలు ఉన్నంత మాత్రాన ఇలాంటి అతి న‌మ్మ‌క ప్ర‌క‌ట‌న‌లు మంచిది కాద‌ని అభిప్రాయ‌ప‌డుతున్నారు.

ప్ర‌స్తుతం ప్ర‌శాంత్ నీల్ వ్యాఖ్య‌లు నెట్టింట పెద్ద దుమార‌మే రేపుతున్నాయి. య‌శ్ వెరీ డౌన్ టూ ఎర్త్. హీరోగా ఎంట్రీ ఇవ్వ‌క ముందు అత‌ని జీవితం ఎలా ఉండేది? అన్న‌ది చాలా మీడియా ఇంట‌ర్వ్యూలో ఓపెన్ గా చెప్పారు. అభిమానుల ప‌ట్ల ఎంతో వినయంగా న‌డుచుకుంటారు. కానీ ప్ర‌శాంత్ నీల్ వ్య‌వ‌హారం అందుకు పూర్తి భిన్నంగా క‌నిపిస్తుంద‌ని నెటి జ‌నులు కామెంట్లు చేస్తున్నారు.. ప్ర‌స్తుతం ప్ర‌శాంత్ నీల్ ప్ర‌భాస్ తో 'స‌లార్' చిత్రాన్ని తెర‌కెక్కిస్తోన్న సంగ‌తి తెలిసిందే.