ప్రేమ్ కుమార్ లైఫ్ తో ఆడుకుంటున్నదెవరు..?

యువ హీరో సంతోష్ శోభన్ నటించిన యూత్ ఫుల్ రొమాంటిక్ కామెడీ ఎంటర్టైనర్ ''ప్రేమ్ కుమార్''. అభిషేక్ మహర్షి అనే కొత్త దర్శకుడు తెరకెక్కిస్తున్న ఈ చిత్రంలో రాశీ సింగ్ హీరోయిన్ గా నటిస్తోంది. సారంగ ఎంటర్టైన్మెంట్స్ పై.లి. పతాకంపై శివప్రసాద్ పన్నీరు ఈ సినిమాని నిర్మిస్తున్నారు.

ఇప్పటికే 'ప్రేమ్ కుమార్' చిత్రం నుంచి విడుదలైన ఫస్ట్ లుక్ - గ్లింప్స్ మంచి స్పందన తెచ్చుకున్నాయి. ఇటీవల వచ్చిన 'నీలాంబరం' శ్రోతలను విశేషంగా అలరించింది. ఈ సినిమాలో పెళ్లి అవ్వడం లేదని సతమతమయ్యే చింతపిక్కల ప్రేమ్ కుమార్ అనే యువకుడిగా సంతోష్ శోభన్ కనిపించనున్నారు.

నేడు హోలీ పండుగ సందర్భంగా శుభాకాంక్షలు తెలుపుతూ మేకర్స్ ఆసక్తికరమైన కార్టూన్ పోస్టర్ ని వదిలారు. 'రంగులతో ఆడుకుంటున్నారా!! ఇక్కడ ప్రేమ్ కుమార్ గాడి జీవితంతో ఆడుకుంటున్నారు. పర్లేదు మీరు ఎంజాయ్ చెయ్యండి' అని పేర్కొన్నారు.

ఈ పోస్టర్ లో సంతోష్ పెళ్లికొడుకు గెటప్ లో ఒక చేతిలో తాళి పట్టుకొని మరో చేతిలో భూతద్దం పట్టుకొని కనిపిస్తున్నాడు. 'నా లైఫ్ లో ఎలాగో కలర్ లేదు.. మీరైనా రకరకాల రంగులతో పండగ చేస్కోండి' అని ప్రేమ్ కుమార్ చెబుతున్నాడు. మనోడి పెళ్లి గోల ఏంటో తెలియాలంటే సినిమా రిలీజ్ అయ్యే వరకు ఆగాల్సిందే.

'ప్రేమ్ కుమార్' చిత్రానికి అభిషేక్ మహర్షి - అనిరుధ్ కృష్ణమూర్తి కలిసి కథ అందించారు. అనంత్ శ్రీకర్ సంగీతం సమకూర్చగా.. కిట్టు విస్సాప్రగడ పాటలు రాసారు. రాంపీ నందిగాం సినిమాటోగ్రఫీ.. గ్యారీ బీహెచ్ ఎడిటింగ్ వర్క్ చేశారు.

ఇప్పటికే షూటింగ్ పూర్తి చేసుకున్న ఈ సినిమాకు సంబంధించిన పోస్ట్ ప్రొడక్షన్ కార్యక్రమాలు జరుగుతున్నాయి. త్వరలోనే ఈ చిత్రాన్ని ప్రేక్షకుల ముందుకు తీసుకురావడానికి మేకర్స్ సన్నాహాలు చేస్తున్నారు.