RRR రిజల్ట్ ని డిసైడ్ చేసేది అవే..!

దర్శకధీరుడు రాజమౌళి తెరకెక్కించిన క్రేజీ మల్టీస్టారర్ 'ఆర్.ఆర్.ఆర్' కోసం యావత్ సినీ ప్రపంచం ఆసక్తిగా ఎదురుచూస్తోంది. యంగ్ టైగర్ ఎన్టీఆర్ - మెగా పవర్ స్టార్ రామ్ చరణ్ ప్రధాన పాత్రలు పోషించిన ఈ బిగ్గెస్ట్ యాక్షన్ డ్రామా మరో నాలుగు రోజుల్లో థియేటర్లలోకి రాబోతోంది.

'బాహుబలి' వంటి వెండితెర అద్భుతాన్ని సృష్టించిన జక్కన్న నుంచి వస్తున్న RRR సినిమాపై భారీ అంచనాలు నెలకొన్నాయి. ఎంతో వ్యయ ప్రయాసలతో దాదాపు మూడేళ్ళ పాటు కష్టపడి ఈ చిత్రాన్ని రూపొందించారు. ఇందులో కళ్ళు చెదిరే విజువల్స్.. హాలీవుడ్ స్థాయి యాక్షన్ బ్లాక్స్ ప్రేక్షకులకు విజువల్ ట్రీట్ ఇవ్వబోతున్నాయి.

అల్లూరి సీతారామరాజు - కొమురం భీమ్ వంటి ఇద్దరు విప్లవ వీరుల నిజ జీవిత పాత్రల స్పూర్తితో ఫిక్షనల్ పీరియాడికల్ డ్రామాగా ''ఆర్.ఆర్.ఆర్'' సినిమా తెరకెక్కింది. ఇందులో హీరోల మధ్య స్నేహాన్ని ప్రధానంగా చూపించబోతున్నట్లు దర్శకుడు మొదటి నుంచీ చెబుతూ వస్తున్నారు.

యాక్షన్ తో పాటుగా బలమైన భావోద్వేగాలకు పెద్ద పీట వేసినట్లు తెలిపారు. 'బాహుబలి' కంటే RRR పెద్దదని.. ఎమోషన్స్ పరంగా చాలా స్ట్రాంగ్ గా ఉంటుందని రాజమౌళి ఆ మధ్య స్టేట్మెంట్ ఇచ్చారు. నిజానికి జక్కన్న చిత్రాల్లో యాక్షన్ మరియు ఎమోషన్స్ బలంగా ఉంటాయి.

ప్రేక్షకులను ఎగ్జైట్ చేసేలా సినిమాలో అలాంటివి కనీసం నాలుగు బలమైన సన్నివేశాలు ఉండేలా చూసుకుంటారు. అవే సినిమా ఫలితాన్ని నిర్ణయిస్తాయి. ఇదే విధంగా తీసిన ప్రతీ చిత్రంతో సక్సెస్ అందుకుంటూ అపజయం ఎరుగని దర్శకుడిగా వెలుగొందుతున్నారు రాజమౌళి.

ఇప్పుడు 'ఆర్.ఆర్.ఆర్' చిత్రంలో కూడా అలాంటి సన్నివేశాలు ఉండబోతున్నాయని తెలుస్తోంది. ఫస్ట్ హాఫ్ లో రెండు సీన్స్ - సెకండాఫ్ లో వచ్చే రెండు సీన్స్ ఈ సినిమా రిజల్ట్ ని డిసైడ్ చేస్తాయని చెప్పవచ్చు. మరి అందరి అంచనాల్ని అధిగమించి ఏ స్థాయి విజయాన్ని అందుకుంటారనేది చూడాలి.

ఇకపోతే RRR రిలీజ్ డేట్ దగ్గర పడుతుండటంతో మేకర్స్ శరవేగంగా ప్రమోషన్స్ చేస్తున్నారు. ప్రపంచ వ్యాప్తంగా హయ్యెస్ట్ స్క్రీన్స్ లలో ఈ సినిమా విడుదల కానుంది. దానికి తగ్గట్టుగానే తొలి రోజున రికార్డు స్థాయి ఓపెనింగ్స్ ను ఎక్స్ పెక్ట్ చేస్తున్నారు. అడ్వాన్స్ బుకింగ్స్ ట్రెండ్ చూస్తుంటే బాక్సాఫీస్ వద్ద వసూళ్ల సునామీ ఖాయంగా కనిపిస్తోంది.