సుకుమార్ కు ప్రేమ‌తో.. సువీక్షిత్‌

అభిమాన తారల కోసం ఫ్యాన్స్ చేసే సాహ‌సాలు అబ్బుర‌ప‌రుస్తుంటాయి. న‌చ్చిన స్టార్ కోసం ఫ్యాన్స్ ఏం చేయ‌డానికైనా ఎంత దూరం వెళ్ల‌డానికైనా వెనుకాడ‌టం లేదు. తాము అభిమానించే వారిని ఆక‌ట్టుకోవ‌డం కోసం ప్ర‌యోగాలు చేయ‌డానికి, స‌హ‌సాలు చేయ‌డానికి ముందుంటున్నారు. స్టార్ ల‌ని ఆశ్చ‌ర్య‌ప‌రుస్తున్నారు. స్టార్ ల కోసం అభిమానులు సాహ‌సోపేత‌మైన ప్ర‌యోగాలు చేస్తూ వార్త‌ల్లో నిలుస్తున్న వేళ యంగ్ హీరో సువీక్షిత్ బొజ్జా త‌న అభిమాన స్టార్ డైరెక్ట‌ర్ సుకుమార్ కోసం చేసిన ప‌ని ఇప్ప‌డు వైర‌ల్ గా మారింది.

వివ‌రాల్లోకి వెళితే... సువీక్షిత్ బొజ్జా గ‌త కొన్నేళ్లుగా స్టార్ డైరెక్ట‌ర్ కి వీరాభిమానిగా మారిపోయారు. త‌న అభిమానాన్ని డైరెక్ట‌ర్ కు తెలియ‌జేయ‌డానికి పెద్ద సాహ‌సానికే పూనుకున్నాడు. ఏ స్థాయిలో సుకుమార్ అంటే త‌న‌కు అబిమాన‌మే చేత‌ల్లో చూపించి ఆశ్చ‌ర్య‌ప‌రిచాడు. ద‌ర్శ‌కుడు సుకుమ‌బార్ పై వ‌వున్న ప్రేమ‌తో ఓ వినూత్న‌మైన ప్రయోగానికి శ్రీ‌కారం చుట్టాడు సువీక్షిత్. స్టార్ డైరెక్ట‌ర్ సుకుమార్ ఇటీవ‌ల తెర‌కెక్కించిన `పుష్ప‌` చిత్రంతో పాన్ ఇండియా డైరెక్ట‌ర్ ల జాబితాలో చేరిపోయిన విష‌యం తెలిసిందే.

బ‌న్నీ హీరోగా న‌టించ‌గా డిసెంబ‌ర్ లో విడుద‌లైన ఈ చిత్రం వ‌ర‌ల్డ్ వైడ్ గా సంచ‌ల‌నం సృష్టించింది. వ‌సూళ్ల ప‌రంగా స‌రికొత్త రికార్డులు తిరగ‌రాసింది. ఈ మూవీ విజ‌యాన్ని సెల‌బ్రేట్ చేసుకున్న హీరో సువీక్షిత్ త‌న అభిమాన ద‌ర్శ‌కుడికి ఊహించ‌ని గిఫ్ట్ ని అందించాడు. `దూర‌ద‌ర్శిని` సినిమాతో హీరోగా ప‌రిచ‌యం అవుతున్న సువీక్షిత్ త‌న అభిమాన ద‌ర్శ‌కుడికి త‌న అభిమాన్ని తెలియ‌జెప్పేందుకు వినూత్న ప్ర‌యోగానికి శ్రీ‌కారం చుట్టాడు. దానిని విజ‌య‌వంతంగా పూర్తి చేశాడు.

సువీక్షిత్ ది ఆంధ్ర‌ప్ర‌దేశ్ క‌డ‌ప జిల్లా లోని బోరెడ్డిగారి ప‌ల్లి గ్రామం. అక్క‌డ త‌న సొంత వ్య‌వ‌సాయ భూమిలోని రెండున్న‌రెక‌రాల భూమిలో ద‌ర్శ‌కుడు సుకుమార్ రాపాన్ని ప్ర‌తిబింబించేలా వ‌రి పంట‌తో సాగు చేశాడు.

దాదాపు 50 రోజుల వ్య‌య ప్ర‌యాస‌ల‌తో ఆ పంట‌ను సుకుమార్ రూపానికి తీసుకొచ్చాడు. సుకుమార్ నెక్ట్స్ మూవీ `పుష్ప -2 ` టైటిల్ ని కూడా వ‌రి తో రూపొందించాడు. ఈ మొత్తాన్ని డ్రోన్ కెమెరాల స‌హాయంలో చిత్రీక‌రించడంతో పాటు స్టార్ డైరెక్ట‌ర్ సుకుమార్ పేరు మీద ప్ర‌త్యేక గీతాన్ని కూడా రెడీ చేశాడు.

సువీక్షిత్ ప్ర‌యోగాత్మ‌కంగా రూపొందించిన సుకుమార్ ఫొటో.. `పుష్ప - 2 ` టైటిల్ ... సినీ ప్రియుల‌తో పాటు అల్లు అర్జున్ అభిమానుల్ని విశేషంగా ఆక‌ట్టుకుంటోంది. తాజాగా సువీక్షిత్ రూపొందించిన ఈ సాంగ్ వీడియోని ప్ర‌త్యేకంగా వీక్షించిన ద‌ర్శ‌కుడు సుకుమార్ `నోట మాట రావ‌డం లేదు.. నా క‌ళ్లు చెమ‌ర్చాయి.. ఓ మ‌నిషి మీద ఇంత అభిమానం వుంటుందా?` అని సువీక్షిత్ ని ప్ర‌త్యేకంగా అభినందించ‌డం విశేషం.