పిక్ టాక్: కర్ణన్ భామతో రొమాంటిక్ గా మాస్ రాజా..!

మాస్ మహారాజా రవితేజ నటిస్తున్న స్పెషల్ యాక్షన్ థ్రిల్లర్ ''రామారావు ఆన్ డ్యూటీ''. శరత్ మండవ దర్శకత్వంలో తెరకెక్కుతున్న ఈ సినిమాలో దివ్యాంశ కౌశిక్ - రజిషా విజయన్ హీరోయిన్లుగా నటిస్తున్నారు.

ఇప్పటికే షూటింగ్ పూర్తి చేసుకున్న ఈ సినిమా విడుదలకు సిద్ధమవుతోంది. ఈ చిత్రానికి పోస్ట్ ప్రొడక్షన్ పనులు కూడా శరవేగంగా జరుగుతున్నాయి. మరోవైపు మేకర్స్ రెగ్యులర్ గా అప్డేట్స్ ఇస్తూ దూకుడుగా ప్రమోషన్స్ చేస్తున్నారు.

'రామారావు ఆన్ డ్యూటీ' చిత్రం నుంచి ఇప్పటి వరకు వచ్చిన ఫస్ట్ లుక్ - స్పెషల్ పోస్టర్స్ - టీజర్ మంచి రెస్పాన్స్ తెచ్చుకున్నాయి. ఈ క్రమంలో ఫస్ట్ సింగిల్ ను రిలీజ్ చేయడానికి మేకర్స్ సన్నాహాలు చేస్తున్నారు.

సంగీత దర్శకుడు శ్యామ్ సీఎస్ స్వరపరిచిన 'బుల్బుల్ తరంగ్' అనే సాంగ్ లిరికల్ వీడియోని ఏప్రిల్ 10న విడుదల చేయనున్నట్లు ప్రకటించారు. ఈ సందర్భంగా హీరోహీరోయిన్లకు సంబంధించిన ఓ పోస్టర్ ని వదిలారు.

ఇందులో రవితేజ మరియు రజిషా ఇద్దరూ రొమాంటిక్‌ గా కళ్ళల్లోకి కళ్ళు పెట్టి చూసుకుంటున్నారు. రవితేజ హ్యాండ్సమ్ గా ఉండగా.. రజిషా హాఫ్ సారీలో అందంగా కనిపిస్తోంది. ఇది వీరిద్దరిపై సాగే ప్రేమ గీతమని అర్థం అవుతుంది. పోస్టర్ బ్యాగ్రౌండ్ లో విదేశీ డ్యాన్సర్లను కూడా చూడవచ్చు.

'బుల్బుల్ తరంగ్' పాటని స్పెయిన్‌ లో చిత్రీకరించారు. గతంలో విడుదలైన ప్రమోషనల్ కంటెంట్ ఈ సినిమాలోని యాక్షన్ సైడ్‌ ను చూపిస్తే.. లేటెస్ట్ గా వచ్చిన ఈ పోస్టర్‌ లో రవితేజ - రజిషాల రొమాన్స్‌ ని చూపించారు.

యదార్థ సంఘటనల ఆధారంగా తెరకెక్కుతున్న 'రామారావు ఆన్ డ్యూటీ' చిత్రంలో రవితేజ డిప్యూటీ కలెక్టర్ గా కనిపించనున్నారు. వేణు తొట్టెంపూడి కీలక పాత్ర పోషిస్తున్నారు. నాజర్ - నరేష్ - పవిత్ర లోకేష్ - తనికెళ్ళ భరణి - రాహుల్ రామకృష్ణ - 'ఈరోజుల్లో' శ్రీ - 'సర్పట్ట' జాన్ విజయ్ ఇతర పాత్రల్లో నటిస్తున్నారు.

శ్రీ లక్ష్మీ వెంకటేశ్వర సినిమాస్ బ్యానర్ పై RT టీమ్ వర్క్స్ సహకారంతో నిర్మాత సుధాకర్ చెరుకూరి ఈ చిత్రాన్ని నిర్మిస్తున్నారు. సత్యన్‌ సూర్యన్‌ సినిమాటోగ్రఫీ అందిస్తుండగా.. ప్రవీణ్ కెఎల్ ఎడిటింగ్ వర్క్ చేస్తున్నారు. సాహి సురేష్ ఆర్ట్ డైరెక్టర్ గా వ్యవహరిస్తున్నారు. 'రామారావు ఆన్ డ్యూటీ' సినిమాని జూన్ 17న ప్రపంచవ్యాప్తంగా రిలీజ్ చేయనున్నారు.