ఏంటీ.. ఎన్టీఆర్‌కు అక్క‌గా మ‌హేష్ హీరోయిన్నా..?

ప్ర‌స్తుతం 'ఆర్ఆర్ఆర్‌' ప్ర‌మోష‌న్స్‌తో బిజీ బిజీగా గ‌డుపుతున్న‌ యంగ్ టైగ‌ర్ ఎన్టీఆర్ త‌న 30వ చిత్రాన్ని కొర‌టాల శివ‌తో ప్ర‌క‌టించిన సంగ‌తి తెలిసిందే. నందమూరి తారకరామారావు ఆర్ట్స్, యువసుధ ఆర్ట్స్ బ్యాన‌ర్ల‌పై మిక్కిలినేని సుధాకర్ ఈ చిత్రాన్ని నిర్మించ‌బోతున్నారు. క‌ళ్యాణ్ రామ్ సమర్పకుడిగా వ్య‌వ‌హ‌రించ‌బోతున్నారు. పాన్ ఇండియా స్థాయిలో తెర‌కెక్క‌బోయే ఈ సినిమా త్వ‌ర‌లోనే సెట్స్ మీద‌కు వెళ్ల‌బోతోంది.

అయితే తాజాగా ఈ సినిమా గురించి ఓ ఆస‌క్తిక‌ర అప్డేట్ బ‌య‌ట‌కు వ‌చ్చింది. అదేంటంటే.. ఈ మూవీ ద్వారా ఓ సీనియ‌ర్ స్టార్ హీరోయిన్ రీ ఎంట్రీ ఇవ్వ‌బోతోంది. ఇంత‌కీ ఆమె ఎవ‌రో కాదు సోనాలి బింద్రే. ముంబైలో పుట్టి పెరిగిన ఈ ముద్దుగుమ్మ‌.. బాలీవుడ్‌లో సినీ కెరీర్ స్టార్ట్ చేసి రెండు ఏళ్ల‌లోనే బిజీ హీరోయిన్‌గా మారిపోయింది.

అక్క‌డ కెరీర్ స‌క్సెస్ ఫుల్‌గా ర‌న్ అవుతున్న స‌మ‌యంలోనే సోనాలి బింద్రే.. మ‌హేష్ బాబు హీరోగా తెర‌కెక్కిన 'మురారి' సినిమాతో తెలుగు ఇండ‌స్ట్రీలోకి అడుగు పెట్టింది.

ఈ సినిమాతో మంచి గుర్తింపు పొందిన ఆమె.. ఆ త‌ర్వాత ఇంద్ర, శంకర్ దాదా ఎంబీబీఎస్, ఖడ్గం, మన్మథుడు ఇలా ఎన్నో విజ‌య‌వంత‌మైన చిత్రాల్లో మెరిసింది. అయితే తెలుగు, హిందీతో పాటు తమిళ, కన్నడ, మరాఠీ చిత్రాల్లోనూ నటించిన సోనాలి బింద్రే.. 2018లో ప్రణాంతకమైన మెటాస్టాటిక్ క్యాన్సర్ బారిన ప‌డింది.

బతకడానికి ముప్పై శాతం అవ‌కాశం మాత్ర‌మే ఉంద‌ని వైద్యులు చెప్పినా.. ఆమె త‌న మ‌నోధైర్యాన్ని కోల్పోకుండా న్యూయార్క్ సిటీ వెళ్ళి ట్రీట్‌మెంట్ చేయించుకుని క్యాన్స‌ర్‌ను జ‌యించింది. ప్ర‌స్తుతం సంపూర్ణంగా కోలుకున్న సోనాలి బింద్రే.. ఇటీవ‌లె హిందీలో 'డ్యాన్స్ ఇండియా డ్యాన్స్ లిటిల్ మాస్టర్స్' అనే ఓ రియాలిటీ షో ద్వారా మ‌ళ్లీ కెమెరా ముందుకు వ‌చ్చింది.

ఇక ఇప్పుడు ఎన్టీఆర్ 30వ చిత్రంలో ఆమె అవ‌కాశం ద‌క్కించుకున్న‌ట్లు వార్త‌లు వ‌స్తున్నాయి. ఈ సినిమాలో ఎన్టీఆర్‌కు అక్క‌గా సోనాలి బింద్రే న‌టించ‌బోతోంద‌ని.. ఇప్ప‌టికే సంప్ర‌దింపులు కూడా పూర్తి అయ్యాయ‌ని అంటున్నారు. మ‌రి ఇందులో ఎంత వ‌ర‌కు నిజ‌ముందో తెలియాలంటే మేక‌ర్స్ నుంచి అధికారిక ప్ర‌క‌ట‌న రావాల్సిందే.