రాక్షసికి డబ్బులూ భారీగానే..

అందాల రాక్షసి అంటూ ప్రశంసలు తప్ప.. డబ్బులు అంతగా తెచ్చి పెట్టలేకపోయిన సినిమాతో టాలీవుడ్ లో అడుగు పెట్టింది లావణ్య త్రిపాఠి. మేకింగ్ తో పాటు ఆ సినిమాలో ప్రధాన ఆకర్షణగా నిలిచి ఆకట్టుకుంది. కానీ ఈ భామ తన కెరీర్ ప్లాన్ చేసుకుంటున్న విధానం మాత్రం అదుర్స్ అనాల్సిందే. నాగార్జునతో సోగ్గాడే చిన్ని నాయన అంటూ బ్లాక్ బస్టర్.. నానితో భలే భలే మగాడివోయ్ అంటూ మరో బ్లాక్ బస్టర్ ఈమె ఖాతాలో ఉన్నాయి. అల్లు శిరీష్ మూవీ శ్రీరస్తు శుభమస్తుతో కూడా హిట్ అందుకుంది లావణ్య.

త్వరలో రిలీజ్ కానున్న నాగ చైతన్య మూవీ యుద్ధం శరణంలోను.. రామ్ మూవీ ఉన్నది ఒకటే జిందగీలోనూ హీరోయిన్ లావణ్యనే. మధ్యలో రాధ అంటూ శర్వానంద్ తో ఫ్లాప్ వచ్చినా ఈమె కెరీర్ కి వచ్చిన ఇబ్బందేమీ లేకపోయింది. ఇప్పుడు మరో క్రేజీ ఆఫర్ ఈమె ఖాతాలోకి చేరిపోయింది. వివి వినాయక్ దర్శకత్వంలో మెగా హీరో సాయిధరం తేజ్ నటిస్తున్న చిత్రంలో ఈ అందాల రాక్షసినే హీరోయిన్ గా ఎంచుకున్నారు. ఇప్పటికే ఈమెతో అగ్రిమెంట్స్ కూడా పూర్తయిపోయాయని తెలుస్తోంది. పెద్ద డైరెక్టర్.. మెగా హీరోతో ఛాన్స్ అంటే సహజంగా.. రెమ్యూనరేషన్ విషయంలో హీరోయిన్స్ కాంప్రమైజ్ కావాల్సి వస్తుంది. కానీ ఈ సినిమా కోసం లావణ్య త్రిపాఠి ఏకంగా 45 లక్షల రూపాయలు అందుకుంటోందట.

పెద్ద సినిమాల్లో కూడా పెద్ద మొత్తంలో పారితోషికం అందుకునే సైన్ చేస్తోందంటే.. లావణ్య త్రిపాఠి క్రేజ్ ఏ రేంజ్ లో ఉందో అర్ధమవుతుంది. నిర్మాత సి కళ్యాణ్ కూడా ఇదే విషయాన్ని చెబుతున్నాడు. అప్ కమింగ్ స్టార్ హీరోయిన్స్ లో.. లావణ్య త్రిపాఠిదే పైచేయి అనడంలో అంతగా సందేహాలు అక్కర్లేదు కదూ!