వినాయక్-తేజు సినిమాలో ఆమె

చాన్నాళ్లుగా ప్రచారంలో ఉన్న కాంబినేషన్ ఓకే అయింది. ఎట్టకేలకు పట్టాల మీదికి వచ్చేసింది. స్టార్ డైరెక్టర్ వి.వి.వినాయక్ దర్శకత్వంలో సాయిధరమ్ తేజ్ హీరోగా సీనియర్ ప్రొడ్యూసర్ సి.కళ్యాణ్ నిర్మాణంలో సినిమా బుధవారమే ప్రారంభోత్సవం జరుపుకున్న సంగతి తెలిసిందే. తేజు తొలిసారి ఓ స్టార్ డైరెక్టర్ తో సినిమా చేస్తుండటం.. అందులోనూ మెగాస్టార్ చిరంజీవి రీఎంట్రీ మూవీ ‘ఖైదీ నంబర్ 150’ తర్వాత వినాయక్ చేస్తున్న ఈ సినిమా ఇది కావడంతో దీనిపై జనాల్లో బాగానే ఆసక్తి కనిపిస్తోంది. వినాయక్ ఆస్థాన రచయిత ఆకుల శివ ఈ చిత్రానికి కథ అందించాడు. ఈ చిత్రానికి ‘దుర్గ’ అని.. ‘ఇంటలిజెంట్’ అని రెండు టైటిళ్లు పరిశీలనలో ఉన్నాయి.

సినిమా ప్రారంభోత్సవం రోజు కథానాయిక.. ఇతర నటీనటులు.. సాంకేతిక నిపుణుల సంగతి వెల్లడించలేదు. ఐతే తాజా సమాచారం ప్రకారం ఈ చిత్రంలో లావణ్య త్రిపాఠి కథానాయికగా నటిస్తుందట. ఆమె తేజు.. వినాయక్ లతో పని చేయబోతుండటం ఇదే తొలిసారి. రాధ.. మిస్టర్ లాంటి ఫ్లాపులతో బాగా వెనుకబడిపోయినట్లు కనిపించిన లావణ్య.. ఈ మధ్య మళ్లీ బాగానే పుంజుకుంటోంది. రామ్ సరసన ‘ఉన్నది ఒకటే జిందగీ’లో అనుకోకుండా అవకాశం దక్కించుకున్న లావణ్య.. ఇప్పుడు వినాయక్-తేజుల క్రేజీ కాంబినేషన్లో తెరకెక్కుతున్న సినిమాలోనూ అవకాశం పట్టేసింది. ఈ చిత్రం వచ్చే ఏడాది వేసవిలో ప్రేక్షకుల ముందుకొస్తుందట. ‘ఖైదీ నంబర్ 150’ ఎంత పెద్ద హిట్టయినప్పటికీ.. ఆ క్రెడిట్ వినాయక్ ఖాతాలోకి రాలేదు. అలాగే తేజు కెరీర్ కూడా ప్రస్తుతం ఇబ్బందుల్లో ఉంది. లావణ్య పరిస్థితీ అంతే. కాబట్టి ఈ ముగ్గురికీ ఈ చిత్రం కీలకమే.