మెగా ఫ్యామిలీలో అందరితో నటిస్తా

మెగా హీరో సాయి ధరమ్ తేజ్ కి ఈమధ్య అన్నీ ప్లాపులే తగులుతున్నాయి పాపం. ఎన్నో ఆశలు పెట్టుకున్న జవాన్ సినిమా కూడా సరిగ్గా ఆడకపోవడంతో తెజూ కెరీర్ డీలా పడిపోయింది. కానీ కొడితే కొట్టాలిరా సిక్స్ కొట్టాలి అన్నట్టు ఈసారి ఎలాగైనా హిట్ కొట్టాలి అనే కసితో 'ఇంటెలిజెంట్'గా మన ముందుకు రాబోతున్నాడు.

వి వి వినాయక్ దర్శకత్వం వహిస్తున్న ఈ చిత్రం లో సొట్టబుగ్గల సుందరి లావణ్య త్రిపాఠి హీరోయిన్ గా కనిపిస్తోంది. అమ్మడికి కూడా ఈ మధ్య పెద్ద హిట్లు ఎం లేకపోవడంతో తాను కూడా తన ఆశలన్నీ ఇంటెలిజెంట్ పైనే పెట్టుకుంది. కాగా వీళ్ళిద్దరూ సినిమా ప్రోమోషన్స్ అంటూ తెగ హడావుడి చేసేస్తున్నారు. మెగా ఫ్యామిలీ నుండి వచ్చిన అందరూ హీరోలు మనకు సుపరిచితమే. ఇప్పటికే సాయి ధరమ్ తేజ్ తో చేసేసారు, వరుణ్ తో మిస్టర్ లో చేశారు - ఇంకా ఏ మెగా హీరోతో తర్వాత చేయబోతున్నారు అని యాంకర్ అడగగా లావణ్య చాలా ఇంటెలిజెంట్ గా సమధానమిచ్చింది. "మెగా ఫామిలీ లో అందరితోనూ నటించాలని ఉంది. వీలైతే సాయి ధరమ్ తేజ్ తమ్ముడు హీరో అయితే తనతో కూడా నటించాలి అనుకుంటున్నా" అని నవ్వేసింది మన అందాల రాక్షసి.

పక్కనే ఉన్న సాయిధరమ్ తేజ్ మాత్రం.. లావణ్య మా తమ్ముడు పెద్దయ్యి హీరో అయ్యేవరకు అలా హీరోయిన్ గా నటిస్తూ ఉంటే అందరికంటే సంతోష పడేది మేనేజర్లు అంటూ ఓ చిన్నపాటి సెటైర్ వేశాడు. లావణ్య మాత్రం ఏముంది నాగ్ సర్ తో చేసాను, చైతన్య తో చేసాను. అలానే అందరూ మెగా హీరోలతో కూడా చేయాలి అనుకుంటూన్నా అని చెప్పుకొచ్చింది.