లావ‌ణ్య త్రిపాఠి టాలెంటు చూడండి!

ఈకాలం క‌థానాయిక‌లు మ‌ల్టీ టాలెంటెడ్ ప‌ర్స‌న్స్‌. వాళ్ల‌ల్లో ర‌క‌ర‌కాల క‌ళ‌లుంటాయి. శ్రుతిహాస‌న్‌ నే తీసుకోండి. ఆమె ఎంత మంచి హీరోయిన్నో, అంత మంచి సింగ‌ర్ కూడా. మ్యూజిక్ కూడా చేస్తుంది. రాయ‌డమూ తెలుసు. త‌మ‌న్నానే తీసుకోండి. ఆమె ఎంత మంచి యాక్ర్ట్రెస్సో అంత మంచి డిజైన‌ర్ కూడా. త‌న డ్రెస్సుల్ని తానే డిజైన్ చేసుకొంటుంది. న‌గ‌ల్నీ డిజైన్ చేస్తుంది. అందుకే ఆన్‌లైన్‌ లో న‌గ‌ల దుకాణం కూడా పెట్టేసింది. ఇలా ప్ర‌తీ క‌థానాయిక‌కి అద‌నంగా ఏదో ఒక టాలెంటు ఉంటుంది. మ‌న అందాల రాక్షసిలోనూ బోలెడన్ని క‌ళ‌లు దాగున్నాయి.

అదేనండీ మ‌న నాని హీరోయిన్ లావ‌ణ్య త్రిపాఠిలో. ఈమెలో ఉన్న టాలెంటుని హీరో నానినే బ‌య‌ట‌పెట్టాడు. నాని ప్ర‌స్తుతం `భ‌లే భ‌లే మ‌గాడివోయ్‌` అనే సినిమా చేస్తున్నాడు. అందులో క‌థానాయిక‌గా లావ‌ణ్య త్రిపాఠి న‌టిస్తోంది. పాటల చిత్రీక‌ర‌ణ కోసం ఇటీవ‌లే గోవా వెళ్లారు. అక్క‌డ బీచ్‌ లో లావ‌ణ్య అంద‌మైన ఓ బొమ్మ వేసింది. ఇసుక‌లో చ‌క‌చ‌కా ఆ బొమ్మ‌ని గీయ‌డం చూసిన నాని అవాక్క‌యిపోయాడు. లావ‌ణ్య‌లో ఇంత మంచి ఆర్టిస్ట్ ఉందా అని వెంట‌నే త‌న సెల్‌ ఫోన్‌ లో ఓ ఫొటో తీశాడు. అదే పైన క‌నిపిస్తున్న ఫొటో. త‌న టాలెంటుని నాని గుర్తించ‌డం చూసి లావ‌ణ్య సంతోషం వ్య‌క్తం చేస్తోంది. ఈమె నాగార్జునతో కలిసి `సోగ్గాడే చిన్నినాయనా` సినిమాలోనూ నటిస్తోంది.