అల్లు కుర్రాడి పక్కన అందాల రాక్షసి

‘అందాల రాక్షసి’లో లావణ్య త్రిపాఠిని చూసి చాలామంది ప్రేమలో పడిపోయారు. ఐతే టాలీవుడ్ జనాలు ఆమె మాయలో పడ్డానికి కొంచెం టైం పట్టింది. మంచు విష్ణుతో చేసిన ‘దూసుకెళ్తా’ హిట్టయినా ఆమెకు పెద్దగా అవకాశాలు రాలేదు. కానీ ఈ మధ్య నెమ్మదిగా అమ్మడి కెరీర్ ఊపందుకుంటోంది. ఇప్పటికే నాగార్జున సరసన ‘సోగ్గాడే చిన్నినాయనా’లో, నానికి జంటగా ‘భలేభలే మగాడివోయ్’లో నటిస్తున్న లావణ్య.. ఇప్పుడింకో ఆఫర్ పట్టేసింది. అల్లు అరవింద్ చిన్న కొడుకు అల్లు శిరీష్ కొత్త సినిమాకు లావణ్యను హీరోయిన్ గా ఫిక్స్ చేశారు. నానితో ‘భలేభలే మగాడివోయ్’ నిర్మిస్తోంది అల్లు అరవింద్ సంస్థే. ఆ సినిమా షూటింగ్ లో లావణ్య టాలెంట్ ఏంటో అర్థమైనట్లుంది.. శిరీష్ పక్కన హీరోయిన్ గా ఛాన్స్ ఇచ్చారు.

గౌరవం లాంటి ఫ్లాప్ తో హీరోగా ఎంట్రీ ఇచ్చిన శిరీష్.. ‘కొత్త జంట’తో ఓ మోస్తరు విజయాన్నందుకున్నాడు. ఈసారి చేస్తే సూపర్ హిట్టే చేయాలన్న లక్ష్యంతో చాన్నాళ్లు గ్యాప్ తీసుకుని పరశురామ్ తో సినిమా ఓకే చేశాడు. గీతా ఆర్ట్స్ టీమ్ ఈ సినిమా మీద చాలా కాలం పని చేసి.. స్క్రిప్టు పక్కాగా రెడీ చేసిందట. నెల కిందట లాంఛనంగా ఆరంభమైన ఈ సినిమా తర్వలోనే సెట్స్ మీదికి వెళ్లనుంది. ఈ సినిమా కోసం అల్లు శిరీష్ తన అవతారం కూడా మార్చుకున్నాడు. జిమ్ములో బాగా కష్టపడి సిక్స్ ప్యాక్ కూడా పెంచాడు. యాక్షన్ నేపథ్యంలో సాగే లవ్ స్టోరీ ఇదని.. శిరీష్ కు కచ్చితంగా హిట్టిచ్చే సినిమా అవుతుందని అంటున్నారు. చూద్దాం ఏమవుతుందో!