లారెన్స్ దర్శకత్వంలో మళ్లీ ఆమె

జ్యోతిక.. ఈ పేరు వినగానే అటు తమిళం ఇటు తెలుగు ఆడియన్స్ గుండెలు జల్లుమంటాయి. ముందుగా తమిళంలోనే స్టార్ స్టేటస్ సంపాదించినప్పటికీ.. ఆ తర్వాత ఠాగూర్, మాస్, షాక్ లాంటి సినిమాలతో జ్యోతిక తెలుగు ప్రేక్షకుల మనసుల్ని కూడా కొల్లగొట్టింది. జ్యోతిక అంటే నచ్చని వాళ్లు సైతం చంద్రముఖి సినిమాతో ఆమె ఫ్యాన్స్ అయిపోయారు. సూర్యను పెళ్లాడాక ఆమె మరింతగా అభిమానుల్ని సంపాదించుకుంది. ఐతే పెళ్లి తర్వాత సినిమాలు మానేయడమే అభిమానుల్ని నిరాశ పరిచింది. ఈ మధ్య ‘36 వయదినిలే’ సినిమాతో రీఎంట్రీ ఇచ్చిన జ్యోతికకు తమిళ ప్రేక్షకులు బ్రహ్మరథం పట్టారు. ఐతే కారణాలేంటో కానీ.. ఆ సినిమాను తెలుగులోకి మాత్రం తేలేదు.

అయినప్పటికీ జ్యోతికను తెలుగు తెరపై చూడలేమని ఫీలవ్వాల్సిన పని లేదు. రాఘవ లారెన్స్ జ్యోతికను తెలుగు ప్రేక్షకులకు చూపించే ప్రయత్నం చేస్తున్నాడు. ముని సిరీస్ లో భాగంగా తీయబోతున్న కొత్త సినిమాలో జ్యోతిక కోసం ఓ కీలక పాత్ర తయారు చేశాడట లారెన్స్. ఎట్టి పరిస్థితుల్లోనూ ఆ పాత్ర ఆమే చేయాలని పట్టుబడుతున్నాడట. జ్యోతిక కూడా ఈ అవకాశాన్ని పరిశీలిస్తోందట. ఈ సినిమాలో కాజల్ మరో కీలక పాత్ర పోషిస్తున్న సంగతి తెలిసిందే. కాంఛన-2లో తాప్సి, నిత్యా మీనన్ లతో తిరుగులేని పెర్ఫామెన్స్ చేయించిన లారెన్స్.. ఇప్పుడు కాజల్, జ్యోతికలకూ అలాంటి ముఖ్యమైన క్యారెక్టర్లే రెడీ చేశాడట. ప్రత్యేకమైన పాత్రలైతే తప్ప చేయనంటున్న జ్యోతిక కోసం తాను అలాంటి క్యారెక్టరే ఇస్తున్నట్లు చెబుతున్నాడు లారెన్స్. మరి జ్యోతిక ఏమంటుందో చూడాలి.