లక్ష్మీస్ ఎన్టీఆర్ కొత్త లీకులు

ఎన్టీఆర్ కథానాయకుడు మహానాయకుడు రెండూ టపా కట్టేసిన నేపధ్యంలో అందరి దృష్టి రామ్ గోపాల్ వర్మ లక్ష్మీస్ ఎన్టీఆర్ మీదే ఉంది. మార్చ్ 22 రిలీజ్ డేట్ ప్రకటించి పోస్టర్స్ కూడా వదిలారు కాబట్టి అభిమానులు నిశ్చింతగా ఉన్నారు కాని గత చరిత్రలో వర్మ మాట మీద నిలబడిన దాఖలాలు చాలా తక్కువ కాబట్టి వీలైనంత ఆశలు పెట్టుకోకపోవడం మంచిది. దానికి తోడు ఆ టైంకంతా ఎన్నికల నోటిఫికేషన్ వచ్చి ఉంటుంది కాబట్టి సెన్సార్ దగ్గరో లేదా ఎన్నికల సంఘం దగ్గరో మెలిక పెట్టి విడుదల ఆపు చేయించవచ్చన్న ధీమాతో టిడిపి వర్గాలు ఉన్నట్టు ఫిలిం నగర్ టాక్.

ఇదిలా ఉండగా లక్ష్మీస్ ఎన్టీఆర్ షూటింగ్ ప్రస్తుతం సిద్దిపేటలో జరుగుతోంది. దీనికి సంబంధించి కొన్ని పిక్స్ లీకయ్యాయి. అందులో ఎన్టీఆర్ ఏదో వ్యాన్ మీద ఆవేశంగా ప్రసంగిస్తుండగా పక్కన లక్ష్మి పార్వతి పాత్రలో ఉన్న నటి గొడుగు పట్టుకుని కింద కూర్చోవడం ఆ మైదానంలో పదుల సంఖ్యలో అంబాసిడర్ కార్లు కొలువు తీరి ఉండటం అంతా ఎన్నికల ప్రచారాన్ని తలపిస్తోంది అయితే షూటింగ్ ప్రాంగణంలో కొన్ని ఆటోలు ఉండటం వాటి మీద జూనియర్ ఎన్టీఆర్ జై లవకుశ బాలకృష్ణ మహానాయకుడు పోస్టర్లు అతికించి ఉండటం ఫోటోలలో కనిపించింది.

చూసుకోకుండా షూటింగ్ లో పెట్టేసి కానిచ్చారా లేక అనుకోకుండా ఆ టైంకి ఆ ఆటో రావడం వల్ల అలా సింక్ అయ్యిందా క్లారిటీ లేదు కాని వర్మ వ్యంగ్యంగా అన్నట్టు ఏదో ఒక రూపంలో బాలయ్య నీడ లక్ష్మీస్ ఎన్టీఆర్ ను వెంటాడుతున్నట్టే ఉంది. ఈ షెడ్యూల్ పూర్తయ్యాక లక్ష్మీస్ ఎన్టీఆర్ కు గుమ్మడి కాయ కొట్టబోతున్నట్టు సమాచారం. ఇప్పటికే బిజినెస్ డీల్స్ పూర్తయ్యాయని వినికిడి. భైరవ గీత విషయంలో పలుమార్లు డేట్ మార్చి పబ్లిసిటీ గేమ్ ఆడిన వర్మ ఇప్పుడు ఈ లక్ష్మీస్ ఎన్టీఆర్ కు ఖచ్చితంగా మాట మీద ఉంటాడని చెప్పలేం. వచ్చే వారం సెన్సార్ కు వెళ్ళినప్పుడు ఆ తర్వాత జరిగే పరిణామాలను బట్టి క్లారిటి వస్తుంది.