`కార్తికేయ 2` కీల‌క క్యారెక్ట‌ర్స్ ఇవిగో

బ్లాక్ బ‌స్ట‌ర్ మూవీస్ కి సీక్వెల్స్ చేస్తూ వాటిని కూడా భారీ స్థాయిలో ప్రేక్ష‌కుల ముందుకు తీసుకొస్తూ పాన్ ఇండియా వైడ్ గా సూప‌ర్ హిట్ లుగా, బ్లాక్ బ‌స్ట‌ర్లుగా మారుస్తున్నారు డైరెక్ట‌ర్లు. ఇప్ప‌టికే అలా వ‌చ్చిన సీక్వెల్స్ పాన్ ఇండియా వైడ్ గా బ్లాక్ బ‌స్ట‌ర్ హిట్ లుగా నిలిచి సీక్వెల్స్ పై వున్న అపోహ‌ని తొల‌గించాయి. ఇప్పుడు ఇదే బాట‌లో మ‌రో క్రేజీ సీక్వెల్ మూవీ ప్రేక్ష‌కుల‌ ముందుకు రాబోతోంది. అదే `కార్తీకేయ 2`. యంగ్ టాలెంటెడ్ హీరో నిఖిల్ న‌టిస్తున్న చిత్ర‌మిది.

టాలెంటెడ్ డైరెక్ట‌ర్ చందూ మొండేటి డైరెక్ట్ చేస్తున్నారు. అనుప‌మ ప‌ర‌మేశ్వ‌ర‌న్ హీరోయిన్‌. అభిషేక్ అగ‌ర్వాల్ ఆర్ట్స్‌, పీపుల్ మీడియా ఫ్యాక్ట‌రీ బ్యాన‌ర్ ల‌పై `ది క‌శ్మీర్ ఫైల్స్` ఫేమ్ అభిషేక్ అగ‌ర్వాల్‌, టి.జి. విశ్వ‌ప్ర‌సాద్ సంయుక్తంగా ఈ మూవీని నిర్మిస్తున్నారు. బాలీవుడ్ పాపుల‌ర్ న‌టుడు అనుప‌మ్ ఖేర్ న‌టిస్తున్న తొలి తెలుగు సినిమా ఇది. 2014లో చందూ మొండేటి ద‌ర్శ‌కుడిగా చేసిన తొలి ప్ర‌య‌త్నం `కార్తికేయ‌`. ఈ మూవీ అప్ప‌ట్లో సంచ‌ల‌న విజ‌యాన్ని సాధించ‌డ‌మే కాకుండా హీరోగా నిఖిల్ కు, ద‌ర్శ‌కుడిగా చందూ మొండేటికి మంచి పేరు తెచ్చిపెట్టింది.

దాదాపు ఎనిమిదేళ్ల విరామం త‌రువాత `కార్తికేయ‌`కు సీక్వెల్ గా ఈ చిత్రాన్ని తెర‌కెక్కిస్తున్నారు. సూప‌ర్ నేచుర‌ల్ మిస్టరీ థ్రిల్ల‌ర్ గా తెర‌కెక్కుతున్న ఈ మూవీలో ద్వార‌క‌లో దాగున్న మిస్ట‌రీని చేధించ‌బోతున్న‌ట్టుగా ఇటీవ‌ల విడుద‌ల చేసిన టీజ‌ర్ ద్వారా స్ప‌ష్ట‌మైంది. ఇండియాస్ మోస్ట్ మిస్టిక‌ల్ అడ్వెంచ‌ర‌స్ థ్రిల్ల‌ర్ గా తెర‌కెక్కుతున్న ఈ మూవీపై ఇప్ప‌టికే భారీ అంచ‌నాలు నెల‌కొన్నాయి. తొలి పార్ట్ లో మిస్ట‌రీని, న‌మ్మాకాన్ని జోడించి చెప్పిన చందూ మొండేటి పార్ట్ 2 లో దేశ వ్యాప్తంగా ఆస‌క్తిని రేకెత్తించే అంశాల‌ని చ‌ర్చించ‌బోతున్న‌ట్టుగా తెలుస్తోంది.

జూలై 22న అత్యంత భారీగా పాన్ ఇండియా స్థాయిలో తెలుగు, త‌మిళ‌, మ‌ల‌యాళ‌, క‌న్న‌డ‌, హిందీ భాష‌ల్లో విడుద‌ల కాబోతోంది. ఈ నేప‌థ్యంలో ప్ర‌చార కార్య‌క్ర‌మాలు మొద‌లు పెట్టిన చిత్ర బృందం శుక్ర‌వారం ఈ మూవీలోని క్యారెక్ట‌ర్ల‌ని రిలీల్ చేస్తూ ఓ మోష‌న్ వీడియోని విడుద‌ల చేసింది. ఇండియాలో అత్యంత ర‌హ‌స్య‌మై మిస్టిక‌ల్ అడ్వెంచ‌ర‌స్ థ్రిల్ల‌ర్ గా రూపొందుతున్న ఈ మూవీలో కార్తికేయ‌గా హీరో నిఖిల్‌, ముగ్ధ గా అనుప‌మ ప‌ర‌మేశ్వ‌ర‌న్‌, కీల‌క పాత్ర‌లో న‌టిస్తున్న అనుప‌మ్ ఖేర్ ధ‌న్వంత‌రీగా, క‌మెడియ‌న్ శ్రీ‌నివాస‌రెడ్డి స‌దానంద‌గా, హ‌ర్షా చెంబోలు సులేమాన్ గా, ఆదిత్య మీన‌న్ శంత‌నుగా క‌నిపించ‌బోతున్నార‌ని చిత్ర బృందం విడుద‌ల చేసిన మోష‌న్ వీడియో ద్వారా స్ప‌షం చేసింది.