'గీత గోవిందం' లీకేజ్.. హ్యాపీనే కదా

విడుదలకు ముందే సినిమాలోని సన్నివేశాలు లీక్ అయితే సంతోషించడమేంటి అంటారా..? ఐతే కొన్నిసార్లు ఇలాంటి నెగెటివ్ విషయాలు కూడా పాజిటివ్ సెంటిమెంటుగా మారుతుంటాయి. విడుదల కంటే ముందే ఏవైనా సన్నివేశాలు లీక్ అయితే ఆ చిత్రం బ్లాక్ బస్టర్ అవుతుందన్న సెంటిమెంటు టాలీవుడ్లో ఉంది. ఐదేళ్ల కిందట ‘అత్తారింటికి దారేది’ సినిమా సగానికి సగం ముందే ఇంటర్నెట్ లో లీక్ అయిపోయింది. అప్పట్లో అది ఎంత సంచలనమైందో తెలిసిందే. ఇండస్ట్రీ మొత్తం ఒక్కసారిగా షేక్ అయిపోయింది ఆ పరిణామంతో. వెంటనే దిద్దుబాటు చర్యలు చేపట్టారు. సినిమాను యధావిధిగా రిలీజ్ చేశారు. ఐతే లీకేజీ ప్రభావం ఏమాత్రం సినిమాపై పడలేదు. ఆ సినిమా ఇరగాడేసింది. ఇండస్ట్రీ హిట్ గా నిలిచింది.

ఇక మూడేళ్ల కిందట ‘బాహుబలి: ది బిగినింగ్’ విషయంలోనూ ఇలాగే జరిగింది. సినిమా నుంచి ఎడిటింగ్ కోసం వెళ్లిన రా ఫుటేజ్ పది నిమిషాలకు పైగా లీక్ అయింది. అది విడుదలకు చాన్నాళ్ల ముందు జరిగింది. అయితేనేం ‘బాహుబలి: ది బిగినింగ్’ చారిత్రక విజయాన్నందుకుంది. ‘బాహుబలి: ది కంక్లూజన్’ విషయంలోనూ ఈ బెడద తప్పలేదు. కాకపోతే ఈ సారి ఏమాత్రం స్పష్టత లేని కంటెంట్ లీక్ అయింది. ఐతే ఈ సినిమాకు కూడా ఇది సెంటిమెంటులా పని చేసింది. సినిమా అసాధారణ విజయాన్నందుకుంది. ఇప్పుడు ‘గీత గోవిందం’ నుంచి కూడా ముందే సీన్లు లీక్ అయ్యాయి. మరి ఈసారి కూడా నెగెటివ్ విషయమే సెంటిమెంటుగా పని చేసి ఈ చిత్రం పెద్ద విజయం సాధిస్తుందేమో చూడాలి. ఐతే ఎంత సెంటిమెంటు పని చేసినా విడుదలకు ముందే తమ సినిమా నుంచి సన్నివేశాలు లీక్ అవ్వాలని ఎవ్వరూ కోరుకోరు. ఆ విషయంలో బాధ పడకుండా ఉండరు.